1200 એક્ટિવાનો સ્ટોક હતો જેમાંથી કોઈ જાણભેદુ 31 એક્ટિવા ચોરી ગયો હતો
(એજન્સી)અમદાવાદ, અમદાવાદના નિકોલ વિસ્તારમાં આવેલા હોન્ડા શોરૂમના ગોડાઉનમાંથી ચાવી સાથેના ૩૧ એક્ટિવા ચોરાવાની સનસનાટીભરી ઘટનામાં નિકોલ પોલીસે ગણતરીના કલાકોમાં સફળતા મેળવી છે. રૂ. ૨૩.૨૫ લાખની કિંમતના વાહનોની ચોરી કરનાર ગેંગને પોલીસે મુદ્દામાલ સાથે દબોચી લીધી છે.
નિકોલના અક્ષર કોમ્પ્લેક્સમાં આવેલા સિંગલ ઓટો મોટીવ પ્રા. લિ. નામના હોન્ડાના શોરૂમમાં ગત ૧ જાન્યુઆરીએ ૧૨૦૦ એક્ટિવાનો સ્ટોક હતો. જોકે, ૧ એપ્રિલના રોજ જ્યારે સ્ટોકની ગણતરી કરવામાં આવી ત્યારે ૩૧ એક્ટિવા ઓછા જણાયા હતા. તપાસ કરતા માલૂમ પડ્યું હતું કે, ગોડાઉનમાં ગાડીઓમાં ચાવીઓ લગાડેલી જ રહેતી હોવાથી કોઈ જાણભેદુ વ્યક્તિ તક જોઈને એક પછી એક ૩૧ વાહનો હંકારી ગયો હતો.
મેનેજર દ્વારા નોંધાવવામાં આવેલી ફરિયાદ બાદ નિકોલ પોલીસે ડીસીપી ઝોન-૫ ના માર્ગદર્શન હેઠળ અલગ-અલગ ટીમો બનાવી હતી. પોલીસે ગોડાઉન અને આસપાસના સીસીટીવી ફૂટેજ તપાસતા કેટલીક શંકાસ્પદ હિલચાલ નજરે પડી હતી.
પોલીસે આરોપીઓની પૂછપરછ કરીને ચોરી થયેલા એક્ટિવા ક્યાં છુપાવ્યા હતા અથવા કોને વેચ્યા હતા તેની વિગતો મેળવીને મોટાભાગનો મુદ્દામાલ રિકવર કરવાની પ્રક્રિયા હાથ ધરી છે.
આરોપીઓએ ત્રણ મહિનાના સમયગાળા દરમિયાન કઈ રીતે નજર ચૂકવીને આટલી મોટી સંખ્યામાં વાહનોની ઉઠાંતરી કરી તેની પણ ઝીણવટભરી તપાસ ચાલી રહી છે. આ કેસના પર્દાફાશથી શોરૂમ સંચાલકોમાં રાહતની લાગણી પ્રસરી છે, તો બીજી તરફ પોલીસે વેપારીઓને પોતાના ગોડાઉન અને સ્ટોકની સુરક્ષા બાબતે વધુ સાવચેત રહેવા અપીલ કરી છે.
ડૉ. જીતેન્દ્ર અગ્રવાલએ આ મામલે જણાવ્યું કે, અમદાવાદ શહેરના ઝોન-૫ વિસ્તારમાં ખાસ કરીને જે નિકોલ, ઓઢવ અને આજુબાજુના જે વિસ્તારો છે ત્યાં છેલ્લા કેટલાક સમયથી જે ઘરફોડ ચોરીઓના બનાવો બનતા હતા, એના અનુસંધાને આખી જે અમારી ટીમ છે – જેમાં નિકોલ પોલીસ સ્ટેશનના પી.આઈ. ઝાલા અને એમની સર્વેલન્સની ટીમ, તથા એસીપી એસ.ડી. પટેલ સાહેબના માર્ગદર્શન હેઠળ આખી ટીમ આના પાછળ કાર્યરત હતી.
