જિલ્લાની ૧૭ સ્થાનિક સ્વરાજ્યની સંસ્થાઓમાં ચૂંટણી પ્રક્રિયા હેઠળ કાયદો અને વ્યવસ્થા જાળવવા તંત્ર સજ્જ
(પ્રતિનિધિ) નડિયાદ, ખેડા જિલ્લામાં આગામી ૨૬ એપ્રિલ ના રોજ યોજાનારી સ્થાનિક સ્વરાજ્યની સંસ્થાઓની સામાન્ય અને પેટા ચૂંટણીને લઈને વહીવટી તંત્ર દ્વારા મતદાન મથકોનું વર્ગીકરણ પૂર્ણ કરવામાં આવ્યું છે. સમગ્ર જિલ્લામાં કુલ ૧૬૯૪ મતદાન મથકો પર મતદાન પ્રક્રિયા હાથ ધરવામાં આવશે, જેમાંથી ૨૩૫ મથકોને સંવેદનશીલ અને ૧૧૩ મથકોને અતિ સંવેદનશીલ તરીકે ચિહ્નિત કરવામાં આવ્યા છે. જેમા મતદાન દિવસે વિશેષ બંદોબસ્ત રાખવામાં આવશે
આગામી ૨૬ એપ્રિલ ના રોજ ખેડા જિલ્લામાં યોજાનારી વિવિધ તાલુકા પંચાયત, જિલ્લા પંચાયત અને નગરપાલિકાઓની ચૂંટણી માટે જિલ્લા વહીવટી તંત્ર દ્વારા વિગતવાર આંકડાકીય વિગતો જાહેર કરવામાં આવી છે. આ વિગતો મુજબ, જિલ્લાની ૧૧ તાલુકા અને જિલ્લા પંચાયત બેઠકો હેઠળ કુલ ૧૩૭૬ મતદાન મથકો આવેલા છે, જે ૯૪૦ અલગ-અલગ સ્થળો પર કાર્યરત રહેશે.
પંચાયત સ્તરે કરવામાં આવેલા વર્ગીકરણ મુજબ ૧૮૪ મથકો સંવેદનશીલ અને ૯૨ મથકો અતિ સંવેદનશીલની યાદીમાં મૂકવામાં આવ્યા છે. જેમાં સૌથી વધુ ૨૭ સંવેદનશીલ અને ૨૬ અતિ સંવેદનશીલ મથકો ઠાસરા તાલુકા અને જિલ્લા પંચાયત વિસ્તારમાં નોંધાયા છે. આ ઉપરાંત કપડવંજમાં ૨૨ સંવેદનશીલ અને ૧૨ અતિ સંવેદનશીલ મથકોની ઓળખ કરવામાં આવી છે.
નગરપાલિકા અને મહાનગરપાલિકા વિસ્તારોની વાત કરવામાં આવે તો, નડીઆદ મહાનગરપાલિકા સહિત કુલ ૬ નગરપાલિકામાં ૩૧૮ મતદાન મથકો તૈયાર કરવામાં આવ્યા છે. આ પૈકી ૧૮૯ મતદાન મથકના સ્થળો નક્કી કરવામાં આવ્યા છે, જેમાં ૫૧ મથકો સંવેદનશીલ અને ૨૧ મથકો અતિ સંવેદનશીલ જાહેર થયા છે.
નડીઆદ મહાનગરપાલિકામાં સૌથી વધુ ૨૧૭ મતદાન મથકો પૈકી ૨૬ મથકો સંવેદનશીલ શ્રેણીમાં છે. કણજરી નગરપાલિકામાં ૬ સંવેદનશીલ અને ૧૧ અતિ સંવેદનશીલ મથકો છે, જ્યારે કપડવંજ નગરપાલિકામાં ૧૦ સંવેદનશીલ અને ૪ અતિ સંવેદનશીલ મથકો ફાળવવામાં આવ્યા છે.
સમગ્ર જિલ્લાના કુલ આંકડા પર નજર કરીએ તો, ૧૧૨૯ મથક સ્થળો પર ફેલાયેલા કુલ ૧૬૯૪ મતદાન મથકો પર ચૂંટણી યોજાશે. શાંતિપૂર્ણ વાતાવરણમાં મતદાન સંપન્ન થાય તે માટે તંત્ર દ્વારા ૨૩૫ સંવેદનશીલ અને ૧૧૩ અતિ સંવેદનશીલ મથકો પર વિશેષ સુરક્ષા અને દેખરેખની વ્યવસ્થા ગોઠવવાની તૈયારીઓ શરૂ કરી દેવામાં આવી છે.
મહુધા નગરપાલિકા વિસ્તારમાં પેટા ચૂંટણીમાં સૌથી ઓછા ૩ મતદાન મથકો છે, જ્યાં એક પણ મથક સંવેદનશીલ કે અતિ સંવેદનશીલ નથી. ઠાસરા નગરપાલિકામાં ૮ મથકો સંવેદનશીલ હોવાનું દર્શાવવામાં આવ્યું છે.
