સુરત ટેક્સટાઈલ ઉત્પાદનનું પાવરહાઉસ: રૂ.૧.૫ લાખ કરોડનું વાર્ષિક ટર્નઓવર
સુરતમાં ટેક્સટાઈલ ઉદ્યોગનો પાયો ૧૯મી સદીમાં નંખાયો હતો,જ્યાં ૧૮૬૬ થી ૧૮૮૧ દરમિયાન મિલો અને જિનિંગ ફેક્ટરીઓની શરૂઆત થઈ હતી.
ગુજરાતના કુલ GDPમાં ૨૫ ટકાથી વધુનો હિસ્સો –સુરતનું નીટેડ ફેબ્રિક વૈશ્વિક ફલક પર ચમકી રહ્યું છે
US,ઈઝરાયેલ અને ન્યુઝીલેન્ડ જેવા વિકસિત દેશો બન્યા સુરતી કાપડના મુરીદ
સુરત, દક્ષિણ ગુજરાતના ઔદ્યોગિક વિકાસને નવી ઊંચાઈ આપવા માટે આગામી તા. ૧લી અને ૨જી મે ૨૦૨૬ના રોજ સુરતની ઑરો યુનિવર્સીટી ખાતે યોજાનાર ‘વાઈબ્રન્ટ ગુજરાત રિજનલ કોન્ફરન્સ (VGRC)’મહત્વપૂર્ણ મંચ સાબિત થશે. આ મહત્ત્વાકાંક્ષી પ્રયાસથી ટેક્સટાઈલ સહિતના મુખ્ય ઉદ્યોગ ક્ષેત્રોમાં મોટા પાયે રોકાણ આકર્ષાશે,વૈશ્વિક ખરીદદારો અને સ્થાનિક ઉત્પાદકો વચ્ચે સીધી જોડાણ ક્ષમતા વધશે તેમજ નવી ટેક્નોલોજી અને ઇનોવેશનના આદાન-પ્રદાનથી સુરત સહિત સમગ્ર દક્ષિણ ગુજરાતના ઔદ્યોગિક વિકાસને નવી દિશા મળશે.
જેની માટીમાં વેપાર અને હવામાં સાહસ છે તેવું સૂર્યપુત્રી તાપી નદીના કિનારે વસેલું સુરત શહેર મુઘલ કાળથી તેની ભૌગોલિક અને ઐતિહાસિક વિશેષતાના કારણે વિશ્વના વ્યાપાર નકશા પર અંકિત થયું હતું. ૧૬મી સદીમાં એક સમૃદ્ધ બંદર તરીકે જાણીતું સુરત આજે ૨૧મી સદીમાં વિશ્વનું‘સિલ્ક સિટી‘બની ગયું છે.
સુરતને‘સિલ્ક સિટી‘નું બિરૂદ મળવા પાછળ એક સમૃદ્ધ ઇતિહાસ છે. સદીઓ પહેલા સુરત બંદરથી રેશમી કાપડનો વેપાર આરબ અને યુરોપના દેશોમાં થતો હતો. સુરતે રિયલ સિલ્કની સાથે મેન-મેડ ફાઇબર (MMF)એટલે કે આર્ટ-સિલ્કમાં મહારત હાંસલ કરી છે.
ભારતમાં બનતા કુલ આર્ટિફિશિયલ સિલ્કનું ૯૦ ટકા ઉત્પાદન એકલું સુરત કરે છે,સિલ્કમાં સુરતની વ્યાપારી કુશળતા‘સિલ્ક સિટી‘થી ખ્યાતનામ બન્યું છે. સુરતની ગલી-કૂંચીઓમાં જરી અને કોટનના લઘુ ઉદ્યોગથી થયેલી શરૂઆત આજે આધુનિક ટેકનોલોજી અને કુશળ કાપડ ઉદ્યોગકારોના કારણે વૈશ્વિક ફલક પર વિસ્તર્યો છે.
સુરતમાં ટેક્સટાઈલ ઉદ્યોગનો પાયો ૧૯મી સદીમાં નંખાયો હતો,જ્યાં ૧૮૬૬ થી ૧૮૮૧ દરમિયાન મિલો અને જિનિંગ ફેક્ટરીઓની શરૂઆત થઈ હતી. ૧૯૨૫માં ટેક્સટાઈલ એસેસરીઝના પ્રથમ કારખાના બાદ આજે આ શહેર ૨૪૦ ભવ્ય માર્કેટ્સ અને ૭૦ હજારથી વધુ વેપારીઓના વિશાળ નેટવર્કમાં પરિવર્તિત થયું છે.
જે ઉદ્યોગ એક સમયે નાના પાયે શરૂ થયો હતો,તે આજે વાર્ષિક દોઢ લાખ કરોડનું ટર્નઓવર ધરાવે છે અને દેશના ખૂણેખૂણેથી ઉદ્યોગપતિઓ માટે રોકાણની પ્રથમ પસંદગી બન્યું છે. હાલમાં આ સેક્ટર અંદાજિત ૧૮થી ૨૦ લાખ લોકોને પ્રત્યક્ષ અને પરોક્ષ રોજગારી પૂરી પાડી રહ્યું છે.
