ઓટો ડેસ્ક. નવી દિલ્હી
ટાટા મોટર્સ 1 જુલાઈથી કોમર્શિયલ વાહનોની કિંમતો વધારવાની તૈયારી કરી રહી છે. નવા દરોમાં 2.5 ટકા સુધીનો વધારો થઈ શકે છે. સૂત્રોના જણાવ્યા અનુસાર, ટાટા મોટર્સે કહ્યું કે કોમોડિટી બજારના વધતા ભાવ અને અન્ય ઈનપુટ ખર્ચની અસરને જોતા અમારે આ પગલું ભરવું પડશે. ચાલુ નાણાકીય વર્ષ 2026-27માં કંપની દ્વારા કિંમતોમાં આ બીજો વધારો છે. કિંમતોમાં આ વધારો વિવિધ મોડલ અને વેરિઅન્ટના આધારે બદલાશે.
ટાટા મોટર્સે 18 જૂનના રોજ જારી કરેલા એક નિવેદનમાં જણાવ્યું હતું કે નવી કિંમતો તેના સમગ્ર કોમર્શિયલ વાહનોના પોર્ટફોલિયોમાં 1 જુલાઈથી પ્રભાવી થશે. કંપનીએ હજુ સુધી મોડલ અનુસાર કિંમતોમાં ફેરફાર જાહેર કર્યો નથી. ટાટા મોટર્સ ભારતમાં નાના કોમર્શિયલ વાહનો, પીક-અપ ટ્રક, મધ્યવર્તી અને ભારે કોમર્શિયલ વાહનો તેમજ બસોનું વેચાણ કરે છે.
ટાટા મોટર્સે આ નાણાકીય વર્ષમાં બીજી વખત કોમર્શિયલ વ્હિકલ બિઝનેસ માટે કિંમતોમાં વધારો કર્યો છે. અગાઉ એપ્રિલ મહિનામાં પણ, કંપનીએ કોમોડિટીની વધતી કિંમતો અને ઇનપુટ ખર્ચને ટાંકીને તેના કોમર્શિયલ વાહનોના ભાવમાં 1.5 ટકાનો વધારો કર્યો હતો.
પેસેન્જર વાહનોના ભાવ પણ વધશેઃ
આના થોડા દિવસો પહેલા જ ટાટા મોટર્સે તેના પેસેન્જર વાહનોના પોર્ટફોલિયોના ભાવમાં 1.5% સુધીનો વધારો કરવાની જાહેરાત કરી હતી. પેસેન્જર વાહનોની નવી કિંમતો પણ 1 જુલાઈથી લાગુ થશે. કંપનીએ આ વધારો ઈનપુટ ખર્ચમાં વધારો અને ફુગાવાના દબાણને આભારી છે. આ વધારો કંપની દ્વારા વેચવામાં આવતા ઈન્ટરનલ કમ્બશન એન્જિન (ICE) મોડલ અને ઇલેક્ટ્રિક વાહનો (EVs) બંને પર લાગુ થશે.
આ ઇનપુટ ખર્ચ છે:
કાચા માલની કિંમત (જેમ કે સ્ટીલ, એલ્યુમિનિયમ, પ્લાસ્ટિક અને રબર), વેતન અને અન્ય ફેક્ટરી ખર્ચ સહિત કોઈપણ વાહનના ઉત્પાદનની કુલ કિંમતને ઈનપુટ ખર્ચ કહેવામાં આવે છે. જ્યારે આ વસ્તુઓ આંતરરાષ્ટ્રીય અથવા સ્થાનિક બજારમાં મોંઘી થાય છે, ત્યારે કંપનીઓ અમુક બોજ ગ્રાહકો પર નાખે છે.
આ પણ વાંચો – અખબાર પહેલા તમારા રાજ્ય/શહેરના સમાચાર વાંચવા માટે ક્લિક કરો.
