ઈઝરાયેલના વડાપ્રધાન બેન્જામિન નેતન્યાહુએ કહ્યું છે કે ઈઝરાયલે અમેરિકી સૈન્ય સહાય પરની નિર્ભરતા ખતમ કરવી જોઈએ. તેમણે પશ્ચિમ કાંઠે ગુશ એટ્ઝિયનમાં અનામત લડાઇ અધિકારીઓ સાથેની બેઠક દરમિયાન આ વાત કહી. ઈઝરાયેલના વડાપ્રધાન નેતન્યાહુએ કહ્યું કે ઈઝરાયલે સ્થાનિક સ્તરે શસ્ત્રોના ઉત્પાદન પર ભાર મૂકવો જોઈએ. ઈરાન અને તેની સાથે જોડાયેલા જૂથો સાથે ચાલી રહેલા સંઘર્ષને ધ્યાનમાં રાખીને આ ફેરફાર જરૂરી છે. અધિકારીઓને સંબોધતા તેમણે કહ્યું કે, આપણે આપણી સ્વતંત્ર શસ્ત્ર-ઉત્પાદન પ્રણાલી વિકસાવવી પડશે. આપણે આપણા પોતાના શસ્ત્રો બનાવવા જોઈએ. તેમણે કહ્યું કે, અમે હાલમાં ઈરાન અને તેના સહયોગી જૂથોનો સામનો કરી રહ્યા છીએ.
અમે તેમને જડબાતોડ જવાબ આપ્યો છે. તે હજી સમાપ્ત થયું નથી, પરંતુ ઘણું બધું આપણી શક્તિ પર નિર્ભર છે. આગામી 30 વર્ષમાં આપણી સ્થિતિ શું હશે તે આપણી તાકાત પર નિર્ભર કરશે. તેથી આપણે આપણી તાકાત વધુ વધારવી પડશે. નેતન્યાહુએ કહ્યું કે તેમનો ધ્યેય ઇઝરાયેલને સ્વતંત્ર શસ્ત્રો ઉત્પાદન ક્ષમતાઓથી સજ્જ કરવાનો છે. આપણે અવલંબનમાંથી મુક્ત થવું પડશે, આપણી શક્તિને સતત વધારવી પડશે, વધુને વધુ ટેક્નોલોજી અપનાવવી પડશે અને તમારા જેવા કમાન્ડરોની નવી પેઢીઓને તૈયાર કરવી પડશે, કારણ કે આ આખરે આપણી સ્થિતિ નક્કી કરશે.
