આંતરરાષ્ટ્રીય બજારમાં કાચા તેલની કિંમતોમાં ભારે ઘટાડા બાદ હવે અમેરિકાના રાજકારણમાં ગરમાવો આવી ગયો છે. અમેરિકાના રાષ્ટ્રપતિ ડોનાલ્ડ ટ્રમ્પે દેશના તમામ પેટ્રોલ રિટેલર્સ (પેટ્રોલ પંપ માલિકો) અને મોટી ઓઈલ કંપનીઓને કડક ચેતવણી આપી છે અને તેમને ઈંધણના ભાવમાં તાત્કાલિક ઘટાડો કરવાનો આદેશ આપ્યો છે. ટ્રમ્પે ઓઈલ કંપનીઓ પર સામાન્ય જનતાને ખિસ્સાકાતરી કરવાનો અને ‘પ્રાઈસ ગગિંગ’ એટલે કે ગેરકાયદેસર નફાખોરી કરવાનો સીધો આરોપ લગાવ્યો છે.
રાષ્ટ્રપતિ ટ્રમ્પે સોશિયલ મીડિયા અને સત્તાવાર નિવેદનો દ્વારા અમેરિકન તેલ કંપનીઓ અને પેટ્રોલ પંપ એસોસિએશનો પર નિશાન સાધ્યું છે. તેમણે જણાવ્યું હતું કે તાજેતરમાં વૈશ્વિક ભૌગોલિક રાજકીય તણાવ (જેમ કે યુએસ-ઈરાન વાટાઘાટો) અને બજારના સેન્ટિમેન્ટને કારણે ક્રૂડ ઓઈલની કિંમત બેરલ દીઠ લગભગ $68 થઈ ગઈ હતી.
ટ્રમ્પની દલીલ છે કે જ્યારે ક્રૂડ ઓઈલ મોંઘુ થાય છે ત્યારે આ કંપનીઓ અમુક કલાકોમાં જ પેટ્રોલ અને ડીઝલના ભાવ વધારી દે છે. પરંતુ હવે જ્યારે ક્રૂડ ઓઈલ 68 ડોલર સુધી પહોંચી ગયું છે, તો શા માટે સામાન્ય અમેરિકન નાગરિકોને તેનો લાભ આપવામાં નથી આવી રહ્યો?
રાષ્ટ્રપતિએ માત્ર ચેતવણી જ નહીં, પણ અમેરિકી ન્યાય વિભાગને આ સમગ્ર મામલાની તપાસ કરવા માટે પણ સૂચના આપી. તેમણે સ્પષ્ટ કહ્યું કે જો રિટેલર્સ ભાવમાં તાત્કાલિક ઘટાડો નહીં કરે તો તેમને ગંભીર કાયદાકીય પરિણામોનો સામનો કરવો પડશે.
મોટી કંપનીઓ પર આપત્તિમાં તકો શોધવાનો આરોપ
ફોર્ચ્યુન અને અલ જઝીરાના અહેવાલો અનુસાર, છેલ્લા કેટલાક મહિનાઓમાં, મધ્ય પૂર્વની કટોકટી અને યુદ્ધની સ્થિતિને કારણે, અમેરિકામાં પેટ્રોલની કિંમતો આસમાનને આંબી રહી હતી, જેના કારણે સામાન્ય લોકો પર ભારે આર્થિક દબાણ હતું.
