ન્યુઝીલેન્ડ સરકારે દેશમાં 16 વર્ષથી ઓછી ઉંમરના બાળકો માટે સોશિયલ મીડિયાના ઉપયોગ પર પ્રતિબંધ મૂકવાના ઉદ્દેશ્ય સાથે ‘ઓનલાઈન સેફ્ટી બિલ’ રજૂ કર્યું છે. ન્યુઝીલેન્ડ સરકારના આ પગલાનો મુખ્ય ઉદ્દેશ યુવાનોને ઓનલાઈન હેરેસમેન્ટ, વ્યસનયુક્ત અલ્ગોરિધમ અને માનસિક સ્વાસ્થ્ય પર થતી પ્રતિકૂળ અસરોથી બચાવવાનો છે.
બિલની મુખ્ય જોગવાઈઓ શું છે?
ટેક્નોલોજી કંપનીઓ પર ભારે દંડઃ મેટા, ટિકટોક, સ્નેપચેટ વગેરે જેવી મોટી કંપનીઓ જે નિયમોનું પાલન કરતી નથી તેમને તેમની વૈશ્વિક આવકના 10 ટકા સુધીનો દંડ થઈ શકે છે.
ઉંમર ચકાસણી પદ્ધતિઓ: પ્લેટફોર્મ્સે ડીજીટલ આઈડી, ચહેરાની ઉંમરનો અંદાજ, વર્તમાન એકાઉન્ટ ડેટા અને અધિકૃત દસ્તાવેજોનો ઉપયોગ ચકાસવા માટે કરવો પડશે કે વપરાશકર્તાઓ 16 વર્ષથી વધુ ઉંમરના છે.
બાળકો કે માતા-પિતા પર કોઈ દંડ નહીંઃ શિક્ષણ મંત્રી એરિકા સ્ટેનફોર્ડે સ્પષ્ટતા કરી કે કાયદાનો અમલ કરવાની સંપૂર્ણ કાનૂની જવાબદારી કંપનીઓની રહેશે, બાળકો કે તેમના માતા-પિતા પર કોઈ દંડ થશે નહીં.
વડા પ્રધાન ક્રિસ્ટોફર લક્સને જણાવ્યું હતું કે, “અમે ન્યુઝીલેન્ડના બાળકોની આખી પેઢીને થતું નુકસાન સ્વીકારી શકતા નથી. 13 થી 17 વર્ષની વયના ત્રણમાંથી એક બાળક સોશિયલ મીડિયા પર દિવસમાં ઓછામાં ઓછા પાંચ કલાક વિતાવે છે, જે તેમના પારિવારિક જીવન, ભણતર અને ઊંઘને અસર કરે છે.”
