અમેરિકાના H-1B વિઝા કાર્યક્રમને લઈને ફરી એકવાર વિવાદ વકર્યો છે. આ વખતે ચર્ચાનું કારણ માઇક્રોસોફ્ટ દ્વારા કર્મચારીઓની મોટા પાયે છટણી છે. જેને લઈને H-1B વિઝા હેઠળ વિદેશી કર્મચારીઓની ભરતીને લઈને સવાલો ઉભા થયા છે. માઇક્રોસોફ્ટે તાજેતરમાં વિશ્વભરમાં લગભગ 4,800 કર્મચારીઓની છટણીની જાહેરાત કરી છે, જે તેના કુલ કર્મચારીઓના લગભગ 2.1 ટકા છે. તેમાંથી, કંપનીના Xbox ગેમિંગ વિભાગમાંથી લગભગ 3,200 નોકરીઓ જતી રહી હતી. કંપનીનું કહેવું છે કે બિઝનેસને વધુ નફાકારક બનાવવા માટે આ નિર્ણય લેવામાં આવ્યો છે.
ભારતીય મૂળની આશા શર્માને આ વર્ષે ફેબ્રુઆરીમાં Xboxની CEO બનાવવામાં આવી હતી. કર્મચારીઓને મોકલવામાં આવેલા સંદેશમાં તેણે કંપનીની આર્થિક સ્થિતિને પણ પડકારજનક ગણાવી હતી. છટણી બાદ રિપબ્લિકન સાંસદ રિલે મૂરે H-1B વિઝા પ્રોગ્રામને સંપૂર્ણ રીતે સમાપ્ત કરવાની માંગ કરી છે. તેઓ આરોપ લગાવે છે કે મોટી ટેક્નોલોજી કંપનીઓ અમેરિકન કર્મચારીઓને બદલી રહી છે અને ઓછા ખર્ચે વિદેશી કામદારો (ખાસ કરીને ભારતના વ્યાવસાયિકો)ની ભરતી કરી રહી છે. મૂરેએ કહ્યું કે H-1B પ્રોગ્રામનો દુરુપયોગ થઈ રહ્યો છે અને તેને સમાપ્ત કરવાનો સમય આવી ગયો છે.
Xbox માં ભરતી સંબંધિત પ્રશ્નો ઉઠાવવામાં આવ્યા છે
એક રિપબ્લિકન ધારાસભ્યએ દાવો કર્યો હતો કે માઇક્રોસોફ્ટે Xbox પર હજારો યુએસ કર્મચારીઓની છટણી કર્યા પછી H-1B વિઝા પર ભારતમાંથી કર્મચારીઓને લાવવા માટે હજારો અરજીઓ ફાઇલ કરી હતી. આને અમેરિકન નોકરીઓ માટે ગંભીર ખતરો ગણાવતા મૂરે કહ્યું કે આનાથી દેશના યુવાનોની રોજગારીની તકો પર અસર પડી રહી છે. સોશિયલ મીડિયા પર પણ આ મુદ્દે ઉગ્ર પ્રતિક્રિયા જોવા મળી હતી. ઘણા લોકોએ આરોપ લગાવ્યો હતો કે અમેરિકન કામદારોની જગ્યાએ વિદેશી કામદારો લેવામાં આવી રહ્યા છે. કેટલાક યુઝર્સે ભારતીય મૂળના સીઈઓ આશા શર્માને પણ નિશાન બનાવ્યા હતા અને દાવો કર્યો હતો કે અમેરિકન કર્મચારીઓની છટણી કરવામાં આવી રહી છે. જો કે, આ દાવાઓને સમર્થન આપવા માટે કોઈ નક્કર પુરાવા આપવામાં આવ્યા નથી.
