રવિવારે ઈરાનના ઓછામાં ઓછા 140 સૈન્ય મથકો પર મિસાઈલ હુમલા બાદ અમેરિકાએ સોમવારે વહેલી સવારે ફરી હુમલો કર્યો. આ અંગે માહિતી આપતા યુએસ સેન્ટ્રલ કમાન્ડે કહ્યું કે ઈરાન હોર્મુઝમાં જહાજો પર હુમલો કરી રહ્યું છે. આવી સ્થિતિમાં તેને કમજોર કરવા બોમ્બમારો કરવામાં આવ્યો છે. અમેરિકાએ કહ્યું કે હોર્મઝુથી પસાર થતા કન્ટેનર જહાજ પર IRGCના હુમલાના જવાબમાં આ કાર્યવાહી કરવામાં આવી છે. આ જહાજમાં ભારતીય ક્રૂ પણ હાજર હતા.
ઈરાનના 8 શહેરોમાં વહેલી સવારે હુમલા થયા
‘અલ જઝીરા’ના અહેવાલ મુજબ સોમવારે વહેલી સવારે ઈરાનના ઓછામાં ઓછા 8 શહેરોમાં હુમલા થયા હતા. અધિકારીઓના જણાવ્યા અનુસાર ખુઝેસ્તાન પ્રાંતના ઘણા વિસ્તારોમાં વિસ્ફોટના અવાજો સંભળાયા હતા. સ્થાનિક સમય અનુસાર, આ હુમલા સવારે 1.35 વાગ્યાની આસપાસ થયા હતા. અધિકારીઓએ જણાવ્યું કે આ હુમલાઓમાં એક વ્યક્તિનું મોત થયું છે અને ઓછામાં ઓછા ચાર લોકો ઘાયલ થયા હોવાના અહેવાલ છે.
ગલ્ફ દેશો પર ઈરાની હુમલા
અમેરિકાના હુમલા બાદ ઈરાને પણ ખાડી દેશોમાં હુમલા શરૂ કર્યા. બહેરીનમાં સોમવારે સવારે સાયરન વાગવા લાગ્યા. બહેરીનની સરકારે લોકોને બિનજરૂરી રીતે રસ્તા પર આવવાથી રોક્યા છે. ઈરાને કુવૈત, કતાર, સંયુક્ત આરબ અમીરાત અને જોર્ડનને પણ નિશાન બનાવ્યા છે. આ હુમલા બાદ પશ્ચિમ એશિયામાં તણાવ વધી ગયો છે. આ કારણે અમેરિકા અને ઈરાન વચ્ચે યુદ્ધવિરામ પણ ખતરામાં છે.
ઈરાને ભારતીય ક્રૂ સાથે જહાજ પર હુમલો કર્યો
રવિવારે ઈરાનના રિવોલ્યુશનરી ગાર્ડે હોર્મુઝમાંથી પસાર થઈ રહેલા GFS ગેલેક્સી કન્ટેનર જહાજ પર હુમલો કર્યો હતો. આ પછી જહાજમાં આગ લાગી હતી. તે સાયપ્રિયોટ ધ્વજ ધરાવતો હતો અને તેમાં ઓછામાં ઓછા 11 ભારતીય ક્રૂ મેમ્બર હતા જેમનો હજુ સુધી કોઈ પત્તો લાગ્યો નથી.
