પાકિસ્તાનના પૂર્વ વડાપ્રધાન અને પાકિસ્તાન મુસ્લિમ લીગ-નવાઝ (PML-N)ના વડા નવાઝ શરીફે એક નવી અને આશ્ચર્યજનક ઈચ્છા વ્યક્ત કરી છે. તે પાકિસ્તાન અધિકૃત કાશ્મીર (PoK)ના વડાપ્રધાન બનવા માંગે છે. પીઓકેની રાજધાની મુઝફ્ફરાબાદમાં એક ચૂંટણી રેલીને સંબોધતા શરીફે કહ્યું કે તેઓ પ્રદેશના વડાપ્રધાન બનવા માંગે છે. જેથી તેઓ પોતે આ વિસ્તારના વિકાસની જવાબદારી સંભાળી શકે. શરીફે દાવો કર્યો કે પીઓકે તેમના માટે તેમના પોતાના પ્રાંત પંજાબ જેટલું જ મહત્વપૂર્ણ છે. તેણે કહ્યું, “આ મારું બીજું ઘર છે. મારા પૂર્વજો કાશ્મીરથી જ આવ્યા હતા.”
પાકિસ્તાનના વડા પ્રધાન શહેબાઝ શરીફના મોટા ભાઈ નવાઝ શરીફે કહ્યું, “જો મારી પાર્ટી જીતશે તો હું વડા પ્રધાન શેહબાઝ શરીફને કહીશ કે મને કાશ્મીર (PoK)નો વડા પ્રધાન બનાવે જેથી હું વ્યક્તિગત રીતે પ્રદેશના વિકાસની દેખરેખ રાખી શકું.” નવાઝ શરીફે સ્પષ્ટતા કરી હતી કે તેમની ઈચ્છા માત્ર પદ માટે નથી પરંતુ પ્રદેશના વિકાસની છે.
પડકારો વચ્ચે ચૂંટણીનો ધમધમાટ
PoKમાં 27 જુલાઈથી 10 ઓગસ્ટની વચ્ચે ચૂંટણી યોજાવાની છે. રસપ્રદ વાત એ છે કે, આ ચૂંટણીઓમાં નવાઝ શરીફની પાર્ટી PML-N પાકિસ્તાન પીપલ્સ પાર્ટી (PPP) સામે ચૂંટણી લડી રહી છે, જે કેન્દ્રમાં તેની ગઠબંધન ભાગીદાર છે. જો કે નવાઝ શરીફનો આ રસ્તો એટલો સરળ લાગતો નથી. આ પ્રદેશ હાલમાં ભારે અશાંતિ અને વિરોધનો સામનો કરી રહ્યો છે. જમ્મુ કાશ્મીર જોઈન્ટ અવામી એક્શન કમિટી (JKJAAC) ના નેતૃત્વમાં મોંઘવારી, વધતા વીજળીના દરો અને વિશિષ્ટ વિશેષાધિકારો વિરુદ્ધ એક વિશાળ આંદોલન ચાલી રહ્યું છે, જેમાં અત્યાર સુધીમાં 30 થી વધુ લોકોએ જીવ ગુમાવ્યો છે.
