લંડન, એજન્સી. વર્લ્ડ ટેસ્ટ ચેમ્પિયનશિપ (WTC)ની ફાઈનલ આવતા વર્ષે 9 થી 13 જૂન દરમિયાન ઓવલ ખાતે રમાશે. આ બીજી વખત હશે જ્યારે આ સ્ટેડિયમ WTC ફાઈનલનું આયોજન કરશે. અગાઉ 2023માં ઓસ્ટ્રેલિયાએ ભારતને હરાવીને ટેસ્ટ ચેમ્પિયનશિપ જીતી હતી. ઇન્ટરનેશનલ ક્રિકેટ કાઉન્સિલ (ICC) એ ગુરુવારે આની જાહેરાત કરી.
ઈંગ્લેન્ડના હોસ્ટિંગની પુષ્ટિ થઈ
ઈંગ્લેન્ડે ગયા વર્ષે 2027, 2029 અને 2031માં આગામી ત્રણ WTC ફાઈનલની યજમાનીના અધિકારો જીત્યા હતા. દરેક તબક્કા માટે મેદાનની પસંદગી યજમાન બોર્ડ ઈંગ્લેન્ડ એન્ડ વેલ્સ ક્રિકેટ બોર્ડ (ECB) દ્વારા કરવામાં આવશે. અત્યાર સુધી રમાયેલી ત્રણેય WTC ફાઈનલ પણ બ્રિટનમાં યોજાઈ છે. વર્તમાન WTC ચક્ર સમાપ્ત થવામાં એક વર્ષથી ઓછો સમય બાકી છે. ફાઇનલમાં જગ્યા બનાવવાની રેસ રોમાંચક વળાંક પર પહોંચી છે. તમામ નવ ટીમો હજુ પણ ફાઈનલની રેસમાં છે.
ઓસ્ટ્રેલિયા ટોચ પર
ઓસ્ટ્રેલિયાએ તેની આઠમાંથી સાત ટેસ્ટ જીતીને 87.50 ટકા પોઈન્ટ સાથે ટેબલમાં ટોચના સ્થાન પર મજબૂત પકડ જાળવી રાખી છે. વર્તમાન ચેમ્પિયન દક્ષિણ આફ્રિકા (75 ટકા) બીજા સ્થાને, ન્યુઝીલેન્ડ (72.22 ટકા) ત્રીજા સ્થાને અને બાંગ્લાદેશ (58.33 ટકા) ચોથા સ્થાને છે. ભારતીય ટીમ (48.15 ટકા) પાંચમા સ્થાને અને શ્રીલંકા (41.67 ટકા) છઠ્ઠા સ્થાને છે. તે પછી ઈંગ્લેન્ડ (24.36 ટકા), વેસ્ટ ઈન્ડિઝ (15 ટકા) અને પાકિસ્તાન (8.33 ટકા) છે.
