મધ્ય પૂર્વમાં ચાલી રહેલા તણાવ અને ઈરાન યુદ્ધ વચ્ચે અમેરિકાએ મોટી કાર્યવાહી કરી છે. ચીન, ભારત, રશિયા અને ઈરાન સ્થિત છ કંપનીઓ અને વ્યક્તિઓ પર કડક આર્થિક પ્રતિબંધો લાદવામાં આવ્યા છે. આ તમામ પર ઈરાન સરકારના ઈસ્લામિક રિવોલ્યુશનરી ગાર્ડ કોર્પ્સ (IRGC) અને તેના મુખ્ય પરિવહન નેટવર્ક મહાન એરને પ્રત્યક્ષ કે પરોક્ષ રીતે સહાય પૂરી પાડવાનો આરોપ છે. અમેરિકી અધિકારીઓનું કહેવું છે કે આ પગલું IRGCની સૈન્ય અને આતંકવાદી ગતિવિધિઓને નબળું પાડવાની દિશામાં એક મોટો પ્રયાસ છે.
યુએસ સ્ટેટ ડિપાર્ટમેન્ટના પ્રવક્તા ટોમી પિગોટે એક સત્તાવાર નિવેદનમાં જણાવ્યું હતું કે અમેરિકાએ આજે ચીન, ભારત, રશિયા અને ઈરાનની છ સંસ્થાઓ અને વ્યક્તિઓ પર પ્રતિબંધો લાદ્યા છે જે ઈરાની સરકારના ઈસ્લામિક રિવોલ્યુશનરી ગાર્ડ કોર્પ્સને સમર્થન આપે છે. તેમાં મહાન એરને સપોર્ટ કરતી કંપનીઓનો પણ સમાવેશ થાય છે. તમને જણાવી દઈએ કે મહાન એર IRGCની મનપસંદ એરલાઈન છે અને તેનો ઉપયોગ નિયમિતપણે હથિયારો, સૈન્ય કર્મચારીઓ અને અન્ય સામાનને એક જગ્યાએથી બીજી જગ્યાએ પહોંચાડવા માટે થાય છે.
આ કાર્યવાહીમાં દાદનેગર સ્ટાર્ટઅપ સ્ટુડિયોને પણ ખાસ નિશાન બનાવવામાં આવ્યો છે. યુએસ અધિકારીઓના જણાવ્યા અનુસાર, તે IRGC સાથે જોડાયેલી એક ફ્રન્ટ કંપની છે, જે મધ્ય પૂર્વ ક્ષેત્રમાં અમેરિકન અને ઇઝરાયેલી સંપત્તિઓ અને કર્મચારીઓના સ્થાનને ટ્રેક કરીને ઇરાની સૈન્ય દળોને ટાર્ગેટ કરવામાં મહત્વપૂર્ણ સહાય પૂરી પાડે છે.
ટ્રેઝરી ડિપાર્ટમેન્ટે પોતાના નિવેદનમાં મહાન એર પર ગંભીર આરોપ લગાવ્યા છે. વિભાગનું કહેવું છે કે મહાન એર IRGC-Quds ફોર્સ માટે મુસાફરી સેવાઓ પૂરી પાડે છે, જેણે લશ્કરી તાલીમ કાર્યક્રમોની સુવિધા આપી છે. આ સિવાય આ એરલાઇન પર ડ્રોન સિસ્ટમની ખરીદી અને પરિવહનમાં સક્રિય ભૂમિકા ભજવવાનો પણ આરોપ છે. ટ્રેઝરી ડિપાર્ટમેન્ટનું માનવું છે કે મહાન એર IRGCના વૈશ્વિક લશ્કરી નેટવર્કનો મહત્વપૂર્ણ ભાગ બની ગઈ છે.
ટ્રેઝરી સેક્રેટરી સ્કોટ બેસન્ટે આ સમગ્ર નેટવર્કની પ્રવૃતિઓ પર કડક વલણ અપનાવતા કહ્યું હતું કે કોઈપણ વ્યક્તિ અથવા કંપની દ્વારા આ નેટવર્કને નાણાકીય અથવા વ્યવસાયિક સેવાઓ પ્રદાન કરવી એ ‘આતંકવાદી સાહસ’ને જીવંત રાખવા અને મજબૂત કરવા સમાન છે. તેમણે સ્પષ્ટ કર્યું કે યુ.એસ. આવા તમામ સહયોગીઓને ખુલ્લા પાડવા અને તેમના કારોબારને ખલેલ પહોંચાડવાના પ્રયાસો ચાલુ રાખશે.
