ભારતીય વાયુસેનાના સૌથી અદ્યતન ફાઇટર એરક્રાફ્ટ રાફેલ વિરૂદ્ધ નિવેદન આપનાર અને ચીની ફાઇટર પ્લેનની પ્રશંસા કરનાર ફ્રેન્ચ નેવીના પૂર્વ પાઇલટને લઇને એક મોટા સમાચાર સામે આવ્યા છે. હાલમાં જ આ પાયલટ પર ચીન માટે જાસૂસી કરવાનો આરોપ લાગ્યો છે. ફ્રેન્ચ મિલિટરી ઈન્ટેલિજન્સ લીક કરવાના ગંભીર આરોપમાં પેરિસમાં તેની અટકાયત કરવામાં આવી છે અને તેની પૂછપરછ ચાલુ છે.
આ પાયલોટનું નામ પિયર હેનરી ચુએટ છે. ઈન્ડિયા ટુડેના એક અહેવાલ અનુસાર, પિયર પર ગંભીર આરોપો લગાવવામાં આવ્યા છે અને તપાસ એજન્સીઓએ તેના ચીન સાથેના સંબંધને લઈને તપાસ શરૂ કરી છે. તેની સામે વિદેશી શક્તિ સાથે ગુપ્ત માહિતી શેર કરવા, રાષ્ટ્રીય સુરક્ષા સાથે સંબંધિત ગુપ્ત માહિતી જાહેર કરવા અને રાષ્ટ્રીય હિતની માહિતી ચોરી જેવા ગંભીર આરોપો ઘડવામાં આવ્યા છે.
રાફેલની બદી, ચીનની વાહવાહી
ઉલ્લેખનીય છે કે સીમા પાર આતંકવાદ મુદ્દે પાકિસ્તાનને કડક ચેતવણી આપવા માટે ભારતે મે 2025માં ઓપરેશન સિંદૂર શરૂ કર્યું હતું. હેનરીએ 4 દિવસ સુધી ચાલેલી યુદ્ધની પરિસ્થિતિ દરમિયાન તેની યુટ્યુબ ચેનલ પર ઘણા વીડિયો બનાવ્યા હતા. તેણે ખોટો દાવો કર્યો હતો કે પાકિસ્તાની વાયુસેનાના ચીની બનાવટના J-10C વિમાને ભારતીય રાફેલને તોડી પાડ્યું હતું. હેનરીએ એક પછી એક અનેક બનાવટી દાવા કર્યા. તેણે ચીનમાં બનેલી J-10C, JF-17 અને PL-15 મિસાઇલોને રાફેલ કિલર કહીને ચાઇનીઝ ટેક્નોલોજીનો પણ પ્રચાર કર્યો હતો.
