પશ્ચિમ એશિયામાં ચાલી રહેલા તણાવ વચ્ચે યુદ્ધગ્રસ્ત ગાઝાને લઈને એક મોટા સમાચાર સામે આવ્યા છે. અમેરિકી રાષ્ટ્રપતિ ડોનાલ્ડ ટ્રમ્પની એક જાહેરાત બાદ છેલ્લા કેટલાય મહિનાઓથી અશાંતિનો સામનો કરી રહેલા ગાઝામાં સ્થિતીમાં સુધારાના સંકેત દેખાઈ રહ્યા છે. વાસ્તવમાં ટ્રમ્પે શુક્રવારે ઐતિહાસિક સમજૂતીની જાહેરાત કરી છે. ટ્રમ્પના જણાવ્યા અનુસાર, તાજેતરની ડીલ હેઠળ હમાસ ગાઝામાં હથિયારો છોડવા માટે સંમત થયા છે. તે જ સમયે, ઇઝરાયેલની સેના પણ ધીમે ધીમે આ વિસ્તારમાંથી હટી જવા માટે રાજી થઈ ગઈ છે.
ટ્રમ્પના કહેવા પ્રમાણે, ‘બોર્ડ ઓફ પીસ’એ આ ડીલને અંતિમ સ્વરૂપ આપવામાં મહત્વની ભૂમિકા ભજવી હતી. તમને જણાવી દઈએ કે આ વર્ષની શરૂઆતમાં ટ્રમ્પની પહેલ પર ગાઝા બોર્ડ ઓફ પીસએ ઔપચારિક રીતે કામ કરવાનું શરૂ કર્યું હતું. હવે આ કરારને જૂથના 20-પોઇન્ટ ગાઝા શાંતિ સૂત્રમાં એક મહત્વપૂર્ણ સીમાચિહ્ન માનવામાં આવી રહ્યું છે.
ટ્રમ્પે શું કહ્યું?
ડોનાલ્ડ ટ્રમ્પે તેમના સોશિયલ મીડિયા ટ્રુથ સોશિયલ પર લખ્યું, “આજે બોર્ડ ઓફ પીસએ ગાઝામાં હમાસ અને અન્ય તમામ સશસ્ત્ર જૂથોને નિઃશસ્ત્ર કરવા માટે એક ઐતિહાસિક સમજૂતી હાંસલ કરી છે. આ સ્થાયી શાંતિ અને સુરક્ષાની દિશામાં એક મોટું પગલું છે.” રાષ્ટ્રપતિ ટ્રમ્પે આ વાટાઘાટોને સફળ બનાવવા માટે ઇજિપ્ત, કતાર અને તુર્કી જેવા મધ્યસ્થી દેશોનો પણ આભાર માન્યો.
