રશિયા અને યુક્રેન વચ્ચે ચાલી રહેલા યુદ્ધની ગરમી હવે પડોશી દેશો સુધી પહોંચવા લાગી છે. જેના કારણે મોટા યુદ્ધનો ભય વધી ગયો છે. ગુરુવારે વહેલી સવારે એક રશિયન મિસાઇલ નાટોના સભ્ય દેશ પોલેન્ડના એરસ્પેસમાં ઘુસીને પડી હતી. આ પછી હંગામો થયો હતો. નાટો દેશોએ તરત જ તેમના F-16 ફાઈટર જેટને હવામાં તૈનાત કરી દીધા. સદ્ભાગ્યની વાત છે કે આ ઘટનામાં કોઈ જાનહાનિના સમાચાર નથી, પરંતુ તેનાથી યુરોપિયન દેશોના હૃદયના ધબકારા વધી ગયા છે.
વિસ્ફોટથી સર્જાયો મોટો ખાડો, યુક્રેનમાં 8ના મોત
રશિયન મિસાઇલ પોલેન્ડના તરનાવા-કોલોનિયાના પૂર્વ ગામમાં પડી હતી, જેનાથી ત્યાં એક મોટો ખાડો સર્જાયો હતો. જો કે જાન-માલનું કોઈ નુકસાન થયું નથી. વાસ્તવમાં, આ મિસાઇલ રશિયાએ યુક્રેન પર રાતોરાત કરેલા મોટા હુમલાનો ભાગ હતો. રશિયાએ યુક્રેન પર બેલેસ્ટિક મિસાઈલ અને ડ્રોનનો બેરેજ લોન્ચ કર્યો હતો. યુક્રેન પરના આ મોટા હુમલામાં બાળકો સહિત ઓછામાં ઓછા 8 નાગરિકોના મોત થયા છે અને 50થી વધુ લોકો ઘાયલ થયા છે.
નાટો અને પોલેન્ડ દ્વારા કડક કાર્યવાહી
આ ઘટના બાદ નાટો અને પોલેન્ડ હાઈ એલર્ટ પર આવી ગયા છે. મિસાઇલ જોવા મળ્યા પછી તરત જ, પોલેન્ડ સહિત નાટોના સભ્યોએ F-16 ફાઇટર જેટ, એરિયલ રિફ્યુઅલિંગ એરક્રાફ્ટ અને પ્રારંભિક ચેતવણી વિમાનો આકાશમાં મોકલ્યા. નાટોના પ્રવક્તા અનુસાર, તેઓ પોતાના ક્ષેત્રની સુરક્ષા માટે તમામ જરૂરી પગલાં લેવાનું ચાલુ રાખશે.
પોલેન્ડના વડા પ્રધાન ડોનાલ્ડ ટસ્ક તાત્કાલિક ઘટનાસ્થળની મુલાકાત લીધી હતી. તેણે સ્પષ્ટપણે કહ્યું કે “બધું જ નિર્દેશ કરે છે” કે તે રશિયન મિસાઈલ છે.
