પાકિસ્તાન: બોલિવૂડની બ્લોકબસ્ટર ફિલ્મ સિરીઝને કારણે ભારતમાં લાઇમલાઇટમાં આવેલો કરાચીનો લિયારી વિસ્તાર ફરી એકવાર હેડલાઇન્સમાં છે. અહીં ગેંગસ્ટર ઉઝૈર બલોચના ભાઈ ઝુબેર બલોચ પર જીવલેણ હુમલો થયો છે. પાકિસ્તાની ચાકીવાડા પોલીસ સ્ટેશનના અધિકારીઓના જણાવ્યા અનુસાર, આ ઘટના ત્યારે બની જ્યારે ઝુબેર બલોચ તેના ઘરની બહાર બેઠો હતો. આ દરમિયાન મોટરસાઇકલ પર આવેલા બે હુમલાખોરોએ ઝડપથી ફાયરિંગ શરૂ કરી દીધું હતું. આ હુમલામાં ઝુબેરને ઘણી ગોળીઓ વાગી હતી. તેની સાથે ત્યાંથી પસાર થઈ રહેલા બે લોકોને પણ ઈજા થઈ હતી. ત્રણેયને કરાચીની હોસ્પિટલમાં લઈ જવામાં આવ્યા છે. જ્યાં ઝુબેરની હાલત નાજુક હોવાનું કહેવાય છે.
પાકિસ્તાની અખબાર ડોનના અહેવાલ મુજબ ઉઝૈર બલોચ હાલમાં જેલમાં છે. તેની ગેરહાજરીમાં તેનો ભાઈ ઝુબેર બલોચ પણ ક્રાઈમ સેક્ટર સાથે સંકળાયેલો છે. પોલીસ અધિકારી સૈયદ અસદ રઝાના જણાવ્યા અનુસાર, ઝુબેર વિરુદ્ધ સાત ગુનાહિત કેસ નોંધાયેલા છે. આ કેસોમાં તે ઘણી વખત જેલ પણ જઈ ચુક્યો છે. પોલીસે કહ્યું કે આ મામલાની દરેક રીતે તપાસ કરવામાં આવી રહી છે. જો કે હજુ સુધી હુમલાખોરોની ધરપકડ કરવામાં આવી નથી.
આ મામલો રાજકીય વિવાદ સાથે જોડાયેલો હોઈ શકે છે
લ્યારીમાં કામ કરતા એક સામાજિક કાર્યકર્તાએ જણાવ્યું કે ઝુબૈર થોડા સમય પહેલા એક રાજકીય પક્ષમાં જોડાયો હતો. આ પછી તેણે લિયારીમાં પાર્ટી સંબંધિત ઝંડા લગાવવાનું શરૂ કર્યું. આથી, અન્ય પક્ષના લોકોએ તેમના પર હુમલો કર્યો હોવાની શક્યતા છે.
