કેનેડાના ટોરોન્ટોમાં ભારતીય મૂળની 30 વર્ષીય હિમાંશી ખુરાનાની ઘાતકી હત્યાના સાત મહિના બાદ પોલીસને એક મોટી સફળતા મળી છે. હત્યા બાદથી ફરાર તેનો સહયોગી અબ્દુલ ગફૂરી ટોરન્ટો એરપોર્ટ પરથી પોલીસના હાથે ઝડપાઈ ગયો છે.
કેનેડિયન પોલીસ અનુસાર, આ ઘટના ઘરેલુ હિંસાનું પરિણામ છે. આરોપી સામે ફર્સ્ટ ડિગ્રી મર્ડરનો ગુનો દાખલ કરવામાં આવ્યો છે.
આંતરરાષ્ટ્રીય એજન્સીઓની મદદથી જાળ બિછાવી હતી
ટોરોન્ટો પોલીસના હોમિસાઈડ યુનિટ અને ફ્યુજીટીવ એપ્રેહેન્સન સ્ક્વોડે અનેક રાષ્ટ્રીય અને આંતરરાષ્ટ્રીય પોલીસ એજન્સીઓ સાથે મળીને એક મોટું ઓપરેશન હાથ ધર્યું હતું.
ગફૂરીને 7 મહિનાની મહેનત અને ઈન્ટરપોલ સહિત આંતરરાષ્ટ્રીય સહયોગ બાદ ટ્રેક ડાઉન કરવામાં આવ્યો હતો. કેનેડા પરત ફર્યા બાદ શુક્રવારે ટોરોન્ટો એરપોર્ટ પર ઉતરતાની સાથે જ પોલીસે તેની ધરપકડ કરી હતી. જોકે, પોલીસે હજુ સુધી એ સ્પષ્ટ કર્યું નથી કે ગફૂરી આટલા મહિનાઓથી કયા દેશમાં છુપાયો હતો.
