પાકિસ્તાનના પૂર્વ વડાપ્રધાન અને પાકિસ્તાન તહરીક-એ-ઈન્સાફ (PTI)ના વડા ઈમરાન ખાનના સ્વાસ્થ્ય અને હાજરીને લઈને ફરી એકવાર અટકળોનું બજાર ગરમ છે. રાવલપિંડીની અદિયાલા જેલમાં બંધ 73 વર્ષીય ઈમરાન ખાનના મૃત્યુનો દાવો કરતા અપ્રમાણિત સમાચાર અને સોશિયલ મીડિયાની અફવાઓએ પાકિસ્તાનના રાજકારણમાં ખળભળાટ મચાવી દીધો છે.
પત્રકારે શું કર્યો દાવો?
અફવાઓએ વેગ પકડ્યો જ્યારે યુએસ સ્થિત પાકિસ્તાની પત્રકાર વજાહત સઈદ ખાને તેની યુટ્યુબ ચેનલ પર મોટો દાવો કર્યો.
તેમણે રાવલપિંડીમાં પાકિસ્તાન આર્મી હેડક્વાર્ટર (GHQ) ખાતે તૈનાત ત્રણ વરિષ્ઠ સૈન્ય અધિકારીઓને ટાંકીને કહ્યું કે તેમને ડર છે કે “ઈમરાન ખાન હવે અમારી સાથે નથી.”
વજાહતે કહ્યું, “તેમના સૂત્રો, જેઓ પાકિસ્તાન આર્મીના ત્રણ વરિષ્ઠ અધિકારીઓ છે, તેમણે કહ્યું છે કે તેમને ડર છે કે પાકિસ્તાનના ભૂતપૂર્વ વડાપ્રધાન ઈમરાન ખાન જેલમાં મૃત્યુ પામ્યા છે અને તેથી પાકિસ્તાની આર્મી ચીફ અસીમ મુનીર તેમને આખા દેશથી છુપાવી રહ્યા છે.”
જો કે, પત્રકારે પોતે કબૂલ્યું હતું કે આ વણચકાસાયેલ માહિતી છે અને કોઈ અધિકારીએ તેને પોતાની આંખે જોઈ નથી, પરંતુ અફવાઓના આધારે આશંકા વ્યક્ત કરી છે.
