ઉત્તરી ફ્રાન્સમાં સ્થિત પશ્ચિમ યુરોપના સૌથી મોટા ન્યુક્લિયર પાવર સ્ટેશન ગ્રેવલાઈન્સ ન્યુક્લિયર પાવર સ્ટેશનમાં દરિયાઈ જીવોના કારણે વીજ ઉત્પાદન અટકી જવાનો અનોખો કિસ્સો પ્રકાશમાં આવ્યો છે. જેલીફિશનું વિશાળ ટોળું કૂલિંગ પંપ અને દરિયાના પાણીના ફિલ્ટરમાં અટવાઈ જતાં પ્લાન્ટના ત્રણ રિએક્ટરને સંપૂર્ણપણે બંધ કરવાની ફરજ પડી છે.
પ્લાન્ટની કામગીરી પર દેખરેખ રાખતી ફ્રેન્ચ કંપની EDFના જણાવ્યા અનુસાર, બરાબર એક વર્ષ પહેલા પણ આવા જ જેલીફિશના હુમલાને કારણે સમગ્ર પ્લાન્ટની કામગીરી ખોરવાઈ ગઈ હતી.
6માંથી માત્ર 1 રિએક્ટર સંપૂર્ણ ક્ષમતા પર કાર્યરત છે
ગ્રેવલાઇન્સ ન્યુક્લિયર પ્લાન્ટમાં કુલ 900-MW ક્ષમતાવાળા છ રિએક્ટરનો સમાવેશ થાય છે, જે કુલ 5.4 GW વીજળી ઉત્પન્ન કરે છે. આ ઘટના પછી પ્લાન્ટની સ્થિતિ નીચે મુજબ છે.
- રિએક્ટર 2, 3 અને 4: જેલીફિશના ટોળા પંપમાં અટવાઈ ગયા પછી સંપૂર્ણપણે બંધ થઈ ગયા.
- રિએક્ટર 1: સાવચેતી તરીકે, તેનું ઉત્પાદન 50% સુધી ઘટાડી દેવામાં આવ્યું છે.
- રિએક્ટર 5: નિયમિત જાળવણી માટે પહેલેથી જ બંધ હતું.
- રિએક્ટર 6: આ એકમાત્ર એકમ છે જે હાલમાં સંપૂર્ણ ક્ષમતાથી કાર્યરત છે.
કંપની (EDF) એ એક સત્તાવાર નિવેદન જારી કરીને સ્પષ્ટતા કરી હતી કે, ‘આ પરિસ્થિતિની સુવિધાઓની સલામતી, અમારા કર્મચારીઓની સલામતી અથવા પર્યાવરણ પર કોઈ અસર થતી નથી. પ્લાન્ટની સલામતી સુનિશ્ચિત કરવા અને રિએક્ટર્સને શક્ય તેટલી ઝડપથી રાષ્ટ્રીય વીજળી ગ્રીડ સાથે જોડવા માટે ઓન-સાઇટ ટીમો તૈનાત કરવામાં આવી છે.
