અમેરિકાના આર્થિક પ્રતિબંધો અને ઈન્ફ્રાસ્ટ્રક્ચર પરના હુમલા વચ્ચે ઈરાને ઉર્જા ક્ષેત્રમાં મોટી સફળતાનો દાવો કર્યો છે. ઈરાનના દક્ષિણ ફાર્સ પ્રાંતમાં 212 બિલિયન ક્યુબિક મીટર (7.5 ટ્રિલિયન ક્યુબિક ફીટ) કરતાં વધુ કુદરતી ગેસનો ભંડાર મળી આવ્યો છે.
ઈરાનના તેલ પ્રધાન મોહસેન પાકનેજાદે દેશના રાષ્ટ્રીય ટેલિવિઝન પર જણાવ્યું હતું કે શોધાયેલા ભંડારમાંથી લગભગ 160 બિલિયન ક્યુબિક મીટર (5.7 ટ્રિલિયન ક્યુબિક ફીટ) ગેસ મેળવી શકાય છે. તેમણે દેશની ભાવિ ઉર્જા સુરક્ષા માટે તેને ખૂબ જ મહત્વપૂર્ણ ગણાવ્યું છે.
આ ગેસ રિઝર્વ ઈરાન માટે શા માટે ખાસ છે?
પાકનેજાદે કહ્યું કે આ “મીઠો” કુદરતી ગેસ છે, જેમાં હાઇડ્રોજન સલ્ફાઇડનું પ્રમાણ નહિવત છે. આનાથી ગેસ રિફાઇનિંગ અને રિકવરીના ખર્ચમાં ઘણો ઘટાડો થશે.
ક્ષમતાની દ્રષ્ટિએ આ શોધને ઈરાનના પ્રખ્યાત દક્ષિણ પાર્સ ગેસ ફિલ્ડના એક આખા બ્લોકની બરાબર માનવામાં આવે છે, જે લગભગ 15 વર્ષ સુધી ગેસ સપ્લાય કરી શકે છે. ઈરાનના અધિકારીઓએ કહ્યું છે કે આ રિઝર્વમાંથી જલદી ઉત્પાદન શરૂ કરવા માટે ઈમરજન્સી પગલાં લેવામાં આવી રહ્યા છે.
