પાકિસ્તાનની જેલમાં પૂર્વ વડાપ્રધાન ઈમરાન ખાન તેમના સ્વાસ્થ્યને લઈને ચાલી રહેલી ચિંતાઓ વચ્ચે, શનિવારે તેમની તબીબી તપાસ કરવામાં આવી હતી. એક મીડિયા રિપોર્ટમાંથી આ માહિતી મળી છે. ઈમરાન ખાન (73) 2023 થી જેલમાં છે, જ્યારે ભ્રષ્ટાચારના કેસમાં દોષિત જાહેર થયા બાદ તેની ધરપકડ કરવામાં આવી હતી. તે હાલમાં રાવલપિંડીની ઉચ્ચ સુરક્ષાવાળી અદિયાલા જેલમાં બંધ છે. ‘જિયો ન્યૂઝ’, સૂત્રોને ટાંકીને જણાવ્યું હતું કે સરકારી સંસ્થા ‘પાકિસ્તાન ઇન્સ્ટિટ્યૂટ ઑફ મેડિકલ સાયન્સ’ (PIMS) ની એક વિશેષ ટીમે પૂર્વ ક્રિકેટરમાંથી રાજકારણી બનેલા ખાનની મેડિકલ તપાસ કરી હતી.
રિપોર્ટ અનુસાર, ખાનને એક વ્યાપક સ્વાસ્થ્ય તપાસ કરાવવામાં આવી હતી, જેમાં બ્લડ પ્રેશર, કોલેસ્ટ્રોલ અને આંખના ટેસ્ટ પણ સામેલ હતા. PIMS ના ડૉક્ટરની આગેવાની હેઠળની એક ટીમે તપાસ હાથ ધરી હતી, જ્યારે અદિયાલા જેલ હોસ્પિટલના મેડિકલ સ્ટાફે પણ મદદ કરી હતી, એમ અહેવાલમાં જણાવાયું છે. ખાને આંખની તકલીફની ફરિયાદ કરી છે અને તેને તબીબી સારવાર માટે ઘણી વખત PIMSમાં લઈ જવામાં આવ્યો છે.
ખાનના સમર્થકોનો આરોપ છે કે યોગ્ય સ્વાસ્થ્ય સુવિધાઓના અભાવે તેમની તબિયત બગડી છે. જોકે, જેલ સત્તાવાળાઓએ આ આરોપને ફગાવી દીધો છે. ખાનને એપ્રિલ 2022 માં અવિશ્વાસની દરખાસ્ત બાદ સત્તા પરથી હટાવવામાં આવ્યા ત્યારથી તેમને સંખ્યાબંધ કાનૂની કેસોનો સામનો કરવો પડ્યો છે.
ઈમરાનની બહેનની અટકાયત
બીજી તરફ, પાકિસ્તાની સત્તાવાળાઓએ આવતા અઠવાડિયે તેમના (ઇમરાનની) પાર્ટીના પ્રસ્તાવિત વિરોધ પહેલા રવિવારે જેલમાં બંધ પૂર્વ વડાપ્રધાન ઇમરાન ખાનની બહેન અલીમા ખાનની અટકાયત કરી હતી. સૂત્રોના જણાવ્યા અનુસાર, અલીમાને લાહોરમાં અટકાયતમાં લેવામાં આવી હતી અને તેને કોટ લખપત જેલમાં મોકલી દેવામાં આવી હતી. તે 2023 થી જેલમાં બંધ 73 વર્ષીય ઈમરાનની મુક્તિ માટે અવાજ ઉઠાવી રહી છે.
અલીમાને પંજાબ મેઈન્ટેનન્સ ઓફ પબ્લિક ઓર્ડર ઓર્ડિનન્સ, 1960 હેઠળ અટકાયતમાં લેવામાં આવી છે. આ કાયદા હેઠળ સ્થાનિક પોલીસને એવી કોઈપણ વ્યક્તિની ધરપકડ કરવાની છૂટ છે જે જાહેર શાંતિ માટે જોખમી માનવામાં આવે છે. લાહોરના ડેપ્યુટી કમિશનર મોહમ્મદ અલી ઈજાઝે 30 દિવસની અવધિ માટે આ અટકાયતનો આદેશ જારી કર્યો છે. 27 સપ્ટેમ્બરે ઈમરાનની પાર્ટી પાકિસ્તાન તહરીક-એ-ઈન્સાફ (પીટીઆઈ)ના વિરોધ પહેલા અલીમાની અટકાયત કરવામાં આવી છે.
