રશિયાના સુદૂર પૂર્વીય અમુર ક્ષેત્રમાં મંગળવારે રશિયાના સંરક્ષણ મંત્રાલયનું એક સૈન્ય વિમાન ટેકઓફના થોડા સમય બાદ ક્રેશ થયું હતું. રશિયન સમાચાર એજન્સી ‘ઇન્ટરફેક્સ’એ સંરક્ષણ મંત્રાલયને ટાંકીને જણાવ્યું કે આ ભયાનક દુર્ઘટનામાં વિમાનમાં સવાર 6 લોકોના મોત થયા છે. પ્રારંભિક અહેવાલો અનુસાર, એરક્રાફ્ટ ટુપોલેવ Tu-154 હતું, જે સોવિયેત યુગનું ત્રણ એન્જિનનું જેટ વિમાન હતું.
ઈંધણની ટાંકીમાં જોરદાર વિસ્ફોટ થયો.
આ અકસ્માત અમુર ક્ષેત્રના માઝાનોવસ્કી જિલ્લામાં સ્થિત ક્રાસ્નોયારોવો ગામ પાસે થયો હતો. પ્રારંભિક અહેવાલો અનુસાર, વિમાનમાં કુલ 7 લોકો સવાર હતા.
અકસ્માત બાદ છ લોકોએ જીવ ગુમાવ્યો હતો, જેમાંથી બેનું હોસ્પિટલ લઈ જતા રસ્તામાં મોત થયું હતું. અન્ય એક વ્યક્તિ ગંભીર રીતે ઘાયલ છે અને તેને હોસ્પિટલમાં દાખલ કરવામાં આવ્યો છે.
પ્લેન જમીન પર પટકાતાની સાથે જ ઈંધણની ટાંકીમાં જોરદાર વિસ્ફોટ થયો, જેના કારણે સમગ્ર કાટમાળમાં જોરદાર આગ લાગી ગઈ. રશિયન સત્તાવાળાઓએ હજુ સુધી અકસ્માતના ચોક્કસ તકનીકી કારણની પુષ્ટિ કરી નથી અને આ મામલે ઉચ્ચ સ્તરીય તપાસના આદેશ આપવામાં આવ્યા છે.
આ અકસ્માતના ઘણા વીડિયો સોશિયલ મીડિયા પર સામે આવ્યા છે, જેમાં પ્લેન સળગતું જોવા મળી રહ્યું છે.
