પાકિસ્તાનનો રાજકીય નકશો ટૂંક સમયમાં બદલાઈ શકે છે. અહેવાલો અનુસાર, પાકિસ્તાનના ફિલ્ડ માર્શલ અસીમ મુનીરનું સમગ્ર ધ્યાન ચાર પ્રાંતોને તોડવા પર છે. હાલમાં પાકિસ્તાનમાં ચાર પ્રાંત પંજાબ, સિંધ, ખૈબર પખ્તુનખ્વા અને બલૂચિસ્તાન છે. ઈકોનોમિસ્ટના અહેવાલ મુજબ આ ચાર પ્રાંતોને તોડીને 12થી 15 નાના પ્રાંત અથવા 160 નાના રાજ્યો બનાવવાની યોજના છે. જો કે હજુ ફાઇનલ પ્લાનને મંજૂરી મળી નથી.
સેનાની તાકાત વધશે
પાકિસ્તાનની રાજનીતિમાં સેનાની દખલગીરી કોઈનાથી છુપી નથી. બલ્કે એમ કહી શકાય કે કઠપૂતળી સરકારની પાછળ લશ્કર જ કામ કરે છે. જો ચારેય પ્રાંતોનું વિભાજન થશે તો પાકિસ્તાનની સત્તાનું માળખું પણ બદલાઈ જશે. ચારેય પ્રાંતો પાસે રહેલી સત્તાઓ ઘટાડીને કેન્દ્ર સરકારની સત્તા વધારી શકાય છે. આ સિવાય સેનાને રાજકીય રીતે પણ વધુ શક્તિશાળી બનાવી શકાય છે.
તમને જણાવી દઈએ કે પાકિસ્તાનનો પંજાબ પ્રાંત સૌથી વધુ વસ્તી ધરાવતો પ્રાંત છે. અહીં લગભગ 12.8 કરોડ લોકો રહે છે. પાકિસ્તાનની અડધી વસ્તી માત્ર પંજાબ પ્રાંતમાં છે. બલૂચિસ્તાન વિસ્તારની દ્રષ્ટિએ સૌથી મોટો પ્રાંત છે પરંતુ તેની વસ્તી ગીચતા ઓછી છે. બલૂચિસ્તાનમાં માત્ર 1.5 કરોડ લોકો રહે છે. મોટા પ્રાંતોના કારણે પાકિસ્તાનમાં ગામડાઓની હાલત ખરાબ છે. સરકારી સુવિધાઓ મેળવવા માટે પણ લોકોને શહેરમાં પહોંચવા માટે કલાકો સુધી મુસાફરી કરવી પડે છે.
