ફ્રાન્સમાં વધી રહેલી હિંસા વચ્ચે અમેરિકાના રાષ્ટ્રપતિ ડોનાલ્ડ ટ્રમ્પે ફ્રાન્સના રાષ્ટ્રપતિ ઈમેન્યુઅલ મેક્રોનની ટીકા કરી છે. ટ્રમ્પે દાવો કર્યો હતો કે પેરિસ ટૂંક સમયમાં મુસ્લિમ શહેર બની જશે. તેમણે ફ્રાન્સમાં ચાલી રહેલી હિંસા માટે ઈમિગ્રેશનને જવાબદાર ઠેરવ્યું અને કહ્યું કે મેક્રોને દેશની સરહદો ઘણા સમય પહેલા બંધ કરી દેવી જોઈતી હતી.
ટ્રમ્પે કહ્યું, “પેરિસ ટૂંક સમયમાં મુસ્લિમ શહેર બનવા જઈ રહ્યું છે… ઈમેન્યુએલે લાંબા સમય પહેલા તેની સરહદો બંધ કરી દેવી જોઈતી હતી. મેં તેને આમ કરવાનું કહ્યું હતું.”
ફ્રાન્સની સ્થિતિને ખૂબ જ દુઃખદ ગણાવતા તેમણે કહ્યું કે ત્યાં જે કંઈ થઈ રહ્યું છે તે ઈમિગ્રેશન સાથે સંબંધિત છે, સ્કૂલ કે અન્ય કોઈ બાબત સાથે નહીં. ટ્રમ્પના કહેવા પ્રમાણે, તેમણે રાષ્ટ્રપતિ મેક્રોનને ફ્રાન્સની સરહદો બંધ કરવા કહ્યું હતું.
ફ્રાન્સમાં હિંસા બાદ સુરક્ષા કડક કરવામાં આવી છે
ટ્રમ્પની આ ટિપ્પણી એવા સમયે આવી છે જ્યારે ફ્રાન્સમાં સપ્તાહના અંતે થયેલી હિંસા બાદ સુરક્ષા વ્યવસ્થા કડક કરવામાં આવી છે. દેશના જુદા જુદા ભાગોમાં હિંસા દરમિયાન મ્યુનિસિપલ ઓફિસો, જાહેર ઇમારતો અને વ્યવસાયિક સંસ્થાઓને નિશાન બનાવવામાં આવી હતી.
