પાકિસ્તાને શુક્રવારે મોડી રાત્રે અફઘાનિસ્તાનની અંદર હવાઈ હુમલો કર્યો, જેમાં 10 લોકો માર્યા ગયા અને 12 અન્ય ઘાયલ થયા. આ હુમલાઓએ 48 કલાકના યુદ્ધવિરામને તોડ્યો જેણે સરહદ પર લગભગ એક અઠવાડિયાની હિંસક અથડામણોને શાંત કરી દીધી. તાલિબાનના અધિકારીએ જણાવ્યું કે પાકિસ્તાને પક્તિકા પ્રાંતમાં ત્રણ સ્થળોએ બોમ્બમારો કર્યો છે. હવે અફઘાનિસ્તાન આનો જવાબ આપશે. પ્રાંતીય હોસ્પિટલના અધિકારીએ જણાવ્યું કે મૃતકોમાં બે બાળકોનો સમાવેશ થાય છે.
અફઘાનિસ્તાન ક્રિકેટ બોર્ડે કહ્યું કે ટૂર્નામેન્ટ માટે હાજર ત્રણ ખેલાડીઓ પણ હુમલામાં માર્યા ગયા. હવે બોર્ડે આવતા મહિને પાકિસ્તાન સાથેની ત્રિકોણીય T20I શ્રેણીમાંથી ખસી જવાનો નિર્ણય લીધો છે. તે જ સમયે, એક વરિષ્ઠ પાકિસ્તાની સુરક્ષા અધિકારીએ જણાવ્યું હતું કે આ ચોક્કસ હવાઈ હુમલા અફઘાન સરહદમાં હાફિઝ ગુલ બહાદુર જૂથને નિશાન બનાવીને કરવામાં આવ્યા હતા, જે તહરીક-એ-તાલિબાન પાકિસ્તાન (ટીટીપી) સાથે સંકળાયેલા છે. ઈસ્લામાબાદે દાવો કર્યો હતો કે આ જૂથ ઉત્તર વઝીરિસ્તાનમાં લશ્કરી કેમ્પ પર આત્મઘાતી હુમલા અને ગોળીબારમાં સામેલ હતું, જેમાં 7 પાકિસ્તાની અર્ધલશ્કરી સૈનિકો માર્યા ગયા હતા.
પાકિસ્તાન-અફઘાનિસ્તાનમાં કેમ વધ્યો તણાવ?
પાકિસ્તાન અને અફઘાનિસ્તાન વચ્ચે તણાવનું મુખ્ય કારણ સુરક્ષા મુદ્દા છે. ઈસ્લામાબાદનો આરોપ છે કે અફઘાનિસ્તાન તેની ધરતી પર TTP જેવા આતંકવાદી જૂથોને આશ્રય આપે છે, જેને કાબુલે નકારી કાઢ્યું છે. તાલિબાનના વિદેશ પ્રધાન ભારતની મુલાકાતે હતા ત્યારે કાબુલમાં વિસ્ફોટ થયા ત્યારે શનિવારથી સરહદ પર હિંસા ખૂબ જ વધી ગઈ હતી. ત્યારબાદ તાલિબાને પાકિસ્તાન સાથેની દક્ષિણ સરહદ પર આક્રમક કાર્યવાહી શરૂ કરી, જેના જવાબમાં ઈસ્લામાબાદે કહ્યું કે તે કડક વલણ અપનાવશે. પાકિસ્તાનના સંરક્ષણ પ્રધાન ખ્વાજા મુહમ્મદ આસિફે કાબુલ પર ભારતનું પ્રોક્સી બનીને પાકિસ્તાન વિરુદ્ધ ષડયંત્ર રચવાનો આરોપ લગાવ્યો હતો.
