સ્થૂળતા સામે લડવા માટે પ્રયાસ કરી રહેલા ચીનના એક જીમે લોકોને વજન ઘટાડવામાં મદદ કરવાનો નવો રસ્તો શોધી કાઢ્યો છે. આ જીમે વજન ઘટાડવાના બદલામાં આટલું ઈનામ જાહેર કર્યું છે, સાંભળીને તમે દંગ રહી જશો. વાસ્તવમાં ઉત્તર ચીનમાં એક ફિટનેસ સેન્ટરે લોકો માટે વજન ઘટાડવાની ચેલેન્જ શરૂ કરી છે, જેમાં ઈનામ તરીકે લક્ઝરી કારનું વચન આપવામાં આવ્યું છે.
સાઉથ ચાઇના મોર્નિંગ પોસ્ટ (SCMP)ના અહેવાલ મુજબ, શેનડોંગ પ્રાંતના બિન્ઝોઉમાં એક જિમ, 23 ઓક્ટોબરે જાહેરાત કરી હતી કે તે ત્રણ મહિનાની અંદર 50 કિલો વજન ઘટાડનાર કોઈપણને પોર્શ પનામેરા ઇનામ આપશે.
જીમના પોસ્ટરથી જાણવા મળ્યું છે કે જે કાર વિજેતાને ઇનામ તરીકે આપવાનું વચન આપવામાં આવ્યું છે તેની કિંમત લગભગ 1.1 મિલિયન યુઆન એટલે કે ચીનમાં લગભગ 1.36 કરોડ રૂપિયા છે. વાંગ નામના ફિટનેસ કોચે સ્થાનિક આઉટલેટને પુષ્ટિ આપી કે સ્પર્ધા વાસ્તવિક છે. “આ પડકાર વાસ્તવિક છે અને શરૂ થઈ ગયો છે અને જ્યારે અમે 30 સહભાગીઓ સુધી પહોંચીશું ત્યારે નોંધણી બંધ થઈ જશે. અત્યાર સુધીમાં લગભગ સાત-આઠ લોકોએ નોંધણી કરાવી છે,” વાંગે જણાવ્યું હતું.
તેમણે જણાવ્યું કે રજિસ્ટ્રેશન ફી 10,000 યુઆન એટલે કે લગભગ 1.23 લાખ રૂપિયા છે. સહભાગીઓ ત્રણ મહિનાના કાર્યક્રમ દરમિયાન સ્પર્ધાના રૂમમાં રહેશે. વાંગે એ પણ સ્પષ્ટ કર્યું કે પોર્શે રજૂ કરવામાં આવી રહી છે તે નવી નથી. “આ કાર જીમના માલિકની છે અને તે 2020 મોડલની જૂની કાર છે જે તે ઘણા વર્ષોથી ચલાવી રહ્યો છે,” તેણે કહ્યું.
