પટના: કોંગ્રેસ નેતા પ્રિયંકા ગાંધી વાડ્રાએ બુધવારે હરિયાણા ચૂંટણીમાં કથિત વોટ ચોરીના રાહુલ ગાંધીના આરોપોને મજબૂત સમર્થન આપ્યું હતું. જનતાને સવાલ કરતા કહ્યું કે, ‘દેશ કેમ ચૂપ છે?’ અને એનડીએ સરકારને ‘ખેંચવા’ માટે લોકોને અપીલ કરી હતી.
પ્રિયંકાએ કહ્યું કે જનતાએ તેમની શક્તિને ઓળખવી જોઈએ અને આ સરકારને બદલવી જોઈએ, કારણ કે એનડીએએ બધું બરબાદ કરી દીધું છે. તેમના નિવેદનથી કોંગ્રેસનો ‘એચ-ફાઈલ્સ’ વિવાદ વધુ ઘેરો બની રહ્યો છે.
પ્રિયંકા ગાંધી વાડ્રાએ બિહારના પશ્ચિમ ચંપારણના વાલ્મિકીનગરમાં આયોજિત જાહેર સભામાં હરિયાણા ચૂંટણીમાં ‘વોટ ચોરી’ના રાહુલ ગાંધીના આરોપોને સમર્થન આપ્યું હતું. તેમણે કહ્યું, ‘આજે મારા ભાઈએ દેશ સમક્ષ મૂક્યું છે કે હરિયાણામાં શું થયું – આ લોકોએ આખી ચૂંટણી કેવી રીતે ચોરી લીધી. દેશ તેને જોઈ રહ્યો છે, પરંતુ મારો દેશને સવાલ છે કે તમે ચૂપ કેમ છો?
જનતાને સંબોધતા પ્રિયંકા ગાંધીએ કહ્યું, ‘તમારી શક્તિને ઓળખો, આ લોકોને બદલો અને સરકારને હટાવો.’ તેમણે કહ્યું કે એનડીએ સરકારે દેશના લોકતાંત્રિક માળખાને નબળું પાડ્યું છે અને જો તેને રોકવામાં નહીં આવે તો તે ‘બધું નષ્ટ’ કરી દેશે.
પ્રિયંકાનું આ નિવેદન એવા સમયે આવ્યું છે જ્યારે રાહુલ ગાંધીએ દિલ્હીમાં એક પ્રેસ કોન્ફરન્સમાં ‘એચ-ફાઈલ્સ’ જાહેર કરી હતી. જેમાં તેમણે હરિયાણા વિધાનસભા ચૂંટણીમાં મોટા પાયે ગેરરીતિઓ અને મત ગણતરીમાં ગોટાળાનો આરોપ લગાવ્યો હતો. રાહુલે દાવો કર્યો કે કોંગ્રેસની જીત ‘વ્યવસ્થિત રીતે ભાજપની જીતમાં રૂપાંતરિત’ થઈ છે.
રાહુલ ગાંધીના દાવા મુજબ, હરિયાણામાં લગભગ 25 લાખ નકલી વોટ મળ્યા હતા, જેમાં એક વ્યક્તિએ 22 વાર વોટ કર્યો હતો. જોકે, ભાજપ અને ચૂંટણી પંચે આ આરોપોને પાયાવિહોણા ગણાવીને ફગાવી દીધા છે. આમ છતાં કોંગ્રેસ પોતાના આરોપો પર અડગ છે અને તેને લોકશાહી બચાવવાની લડાઈ ગણાવી રહી છે.
