ભારતીય કેપ્ટન શુભમન ગિલનું દક્ષિણ આફ્રિકા સામે ગુવાહાટીમાં 22 નવેમ્બરથી રમાનારી બીજી ટેસ્ટમાં રમવું શંકાસ્પદ છે. ક્રિકેટ એસોસિએશન ઓફ બંગાળ (CAB) ના સૂત્રોએ પુષ્ટિ કરી કે તે બુધવારે ટીમની સાથે ગુવાહાટી જશે નહીં. ટીમ મંગળવારે વૈકલ્પિક તાલીમ સત્ર કરશે. કોલકાતાના ઈડન ગાર્ડન્સ ખાતેની પ્રથમ ટેસ્ટ દરમિયાન ગિલને ગરદનમાં ઈજા થઈ હતી. રવિવારે તેમને હોસ્પિટલમાંથી રજા આપવામાં આવી હતી. મેચના બીજા દિવસે બેટિંગ કરતી વખતે ઈજાગ્રસ્ત થયેલા ગિલ બીજા દાવમાં બેટિંગ કરવા માટે ઉપલબ્ધ નહોતો.
“તેને ગરદનમાં તીવ્ર દુખાવો છે અને અમને ઈજા વિશે વધુ વિગતો આપવાની મંજૂરી નથી,” સૂત્રએ પીટીઆઈને જણાવ્યું. તેણે ગળામાં કોલર પહેરવાનું ચાલુ રાખવું પડશે.” સૂત્રે કહ્યું, ”તેને ત્રણ-ચાર દિવસ આરામ કરવાની અને હવાઈ મુસાફરી ન કરવાની સલાહ આપવામાં આવી છે. આ સ્થિતિમાં તેમને ગુવાહાટી જવાની સલાહ આપવામાં આવી નથી. પરંતુ અમે તેમની પ્રગતિ પર નજર રાખી રહ્યા છીએ અને મંગળવાર સુધીમાં ચિત્ર સ્પષ્ટ થઈ જશે.
ભારતીય ટીમ શનિવારથી શરૂ થનારી બીજી અને અંતિમ ટેસ્ટ માટે બુધવારે ગુવાહાટી રવાના થવાની છે. મુખ્ય કોચ ગૌતમ ગંભીરે મેચ પછીની પ્રેસ કોન્ફરન્સમાં જણાવ્યું હતું કે ગિલની હજુ પણ તપાસ કરવામાં આવી રહી છે અને તેને ફિઝિયો અને મેડિકલ સ્ટાફ દ્વારા મૂલ્યાંકનના બીજા રાઉન્ડમાંથી પસાર થવું પડશે. ગિલની ગેરહાજરીમાં ભારતીય ટીમ પ્રથમ ટેસ્ટની ચોથી ઇનિંગમાં 124 રનના લક્ષ્યાંકને હાંસલ કરવામાં નિષ્ફળ રહી અને 30 રનથી હારી ગઈ. જો ગિલ આઉટ થશે તો ભારત પાસે સાઈ સુદર્શન અને દેવદત્ત પડિકલને રમવાનો વિકલ્પ હશે.
ગંભીરે રવિવારે ટીકા કરાયેલ ઈડન ગાર્ડન્સ ક્યુરેટરને ટેકો આપ્યો હતો અને દક્ષિણ આફ્રિકા સામેની પ્રથમ ટેસ્ટમાં પડકારજનક પીચ પર “દબાણનો સામનો કરવા” અને રન બનાવવા માટે તેના બેટ્સમેનોની અસમર્થતા પર શોક વ્યક્ત કર્યો હતો. ગંભીરે મેચ પછીની પ્રેસ કોન્ફરન્સમાં કહ્યું, “એવું નહોતું કે તે રમી શકાય તેવી વિકેટ ન હતી, તેમાં કોઈ મુશ્કેલી ન હતી.” તેણે કહ્યું, “જો તમે હિંમતવાન છો, તમારી રક્ષણાત્મક રમત મજબૂત છે અને તમે ધીરજ બતાવી શકો છો, તો આ પીચ પર તમે રન બનાવી શકો છો.” મેચમાં, માત્ર આઠ સેશનમાં 38 વિકેટ પડી હતી (શુબમન ગિલ રિટાયર્ડ હર્ટ થયો હતો) અને તેમાંથી 16 વિકેટ ઝડપી બોલરોએ લીધી હતી જ્યારે સ્પિનરોએ 22 વિકેટો લીધી હતી.
