આ વર્ષે એપ્રિલમાં પહેલગામ આતંકવાદી હુમલા બાદથી ભારત અને પાકિસ્તાન વચ્ચે રમતગમતના મેદાન પર પણ તણાવ સ્પષ્ટ દેખાઈ રહ્યો છે. એશિયા કપ ક્રિકેટ ટુર્નામેન્ટમાં, બંને ટીમો ત્રણ વખત એકબીજા સામે રમી હતી પરંતુ ન તો કેપ્ટન્સે અને ન તો ખેલાડીઓએ હાથ મિલાવ્યા હતા. મહિલા વર્લ્ડ કપની મેચમાં પણ આવું જ થયું હતું. રવિવારે એશિયા કપ રાઇઝિંગ ટૂર્નામેન્ટમાં પણ ભારત A અને પાકિસ્તાન શાહીન્સના ખેલાડીઓએ એકબીજા સાથે હાથ મિલાવ્યા ન હતા. પરંતુ રવિવારે જ અન્ય એક ક્રિકેટ મેચમાં બંને દેશોના ખેલાડીઓએ એકબીજા સાથે હાથ મિલાવ્યા હતા.
આ મેચ બ્લાઈન્ડ કેટેગરીના મહિલા T20 વર્લ્ડ કપની હતી. રવિવારે કોલંબોમાં ભારત અને પાકિસ્તાનની ટીમો આમને-સામને હતી જેમાં ભારતીય ટીમે પાકિસ્તાની ટીમને 8 વિકેટે પરાજય આપ્યો હતો અને લક્ષ્ય માત્ર 10 ઓવરમાં હાંસલ કરી લીધું હતું. ટૂર્નામેન્ટમાં ભારતીય ટીમની આ પાંચમી જીત હતી અને તેણે ગર્વભેર સેમિફાઇનલમાં પ્રવેશ કર્યો છે.
આ મેચમાં પણ ટોસ દરમિયાન બંને ટીમના કેપ્ટનોએ એકબીજા સાથે હાથ મિલાવ્યા ન હતા. પરંતુ મેચ પુરી થયા બાદ બંને ટીમના ખેલાડીઓએ હાથ મિલાવીને એકબીજાને શુભેચ્છા પાઠવી હતી. આટલું જ નહીં બંને ટીમો મેચ માટે એક જ બસમાં સ્ટેડિયમ પહોંચી હતી.
મેચ પુરી થયા બાદ પાકિસ્તાની ટીમના કેપ્ટન નિમરા રફીકે ભારતને જીત માટે અભિનંદન પાઠવ્યા હતા. ભારતીય કેપ્ટન દીપિકાએ પણ પાકિસ્તાની ખેલાડીઓની શાનદાર રમતની પ્રશંસા કરી હતી. જોકે, બંને ટીમોને મીડિયા સાથે વાત કરવાની મંજૂરી આપવામાં આવી ન હતી.
ભારત અને પાકિસ્તાનની અંધ મહિલા ટીમો હાથ મિલાવે છે તેનો વીડિયો જોવા માટે અહીં ક્લિક કરો.
