પાકિસ્તાનના સ્ટાર બેટ્સમેન બાબર આઝમને રાવલપિંડીમાં શ્રીલંકા સામેની ત્રીજી વનડેમાં આઉટ થયા બાદ તેના બેટથી સ્ટમ્પ પર મારવા બદલ તેની મેચ ફીના 10 ટકા દંડ ફટકારવામાં આવ્યો છે. આ સિવાય તેને એક ડીમેરિટ પોઈન્ટ આપવામાં આવ્યો છે.
બાબરે ICC આચાર સંહિતાના નિયમ 2.2નો ભંગ કર્યો હતો જે આંતરરાષ્ટ્રીય મેચ દરમિયાન ક્રિકેટના સાધનો અથવા કપડા, મેદાન પરના સાધનો અથવા ફિક્સર અને ફિટિંગને નુકસાન પહોંચાડવા સંબંધિત છે. આ ઉપરાંત, 31 વર્ષીય બેટ્સમેનના અનુશાસનાત્મક રેકોર્ડમાં એક ડીમેરિટ પોઈન્ટ ઉમેરવામાં આવ્યો છે, જે 24 મહિનાના સમયગાળામાં બાબરનો પ્રથમ ગુનો બન્યો છે.
આ ઘટના રવિવારે શ્રેણીની છેલ્લી ODIમાં પાકિસ્તાનની ઈનિંગની 21મી ઓવરમાં બની હતી જ્યારે બાબરે આઉટ થયા બાદ ક્રિઝ છોડતા પહેલા તેનું બેટ સ્ટમ્પ પર વાગ્યું હતું.
મેદાન પરના અમ્પાયર એલેક્સ વ્હાર્ફે અને રાશિદ રિયાઝ, ત્રીજા અમ્પાયર શરાફુદ્દૌલા ઈબ્ને શાહિદ અને ચોથા અમ્પાયર ફૈઝલ આફ્રિદીએ આરોપો મૂક્યા હતા જ્યારે ICCની ઈન્ટરનેશનલ પેનલ ઓફ મેચ રેફરીના અલી નકવીએ પ્રતિબંધનો પ્રસ્તાવ મૂક્યો હતો.
ICCએ એક નિવેદનમાં જણાવ્યું હતું કે, ‘પાકિસ્તાની બેટ્સમેને ગુનો કબૂલ કર્યો હતો અને ઔપચારિક સુનાવણીની જરૂરિયાતને દૂર કરીને પ્રતિબંધ લાદવામાં આવ્યો હતો.’
