એશિયા કપ રાઇઝિંગ સ્ટાર્સ 2025ની સેમિફાઇનલમાં પહોંચનારી બે ટીમોની જાહેરાત કરવામાં આવી છે. ગ્રુપ બીની તમામ લીગ મેચો રમાઈ ગઈ છે. આ ગ્રુપમાં ભારત A અને પાકિસ્તાન A ટીમો પણ સામેલ હતી. આ ગ્રુપમાંથી પાકિસ્તાન પહેલા સેમિફાઈનલ માટે ક્વોલિફાય થયું હતું અને હવે ભારતે પણ ટોપ 4માં જગ્યા બનાવી લીધી છે.ભારત અને પાકિસ્તાનની ટીમો વચ્ચેની ટક્કર ભલે સેમીફાઈનલમાં ન હોય, પરંતુ ફાઈનલમાં ચોક્કસ થઈ શકે છે.
વાસ્તવમાં, પાકિસ્તાને તમામ 3 મેચ જીતીને સેમિફાઇનલમાં પ્રવેશ કર્યો છે, જ્યારે ભારતે 3માંથી બે મેચ જીતી છે. ભારતીય ટીમ પાકિસ્તાન સામે હારી ગઈ હતી. ભારતીય ટીમ પાકિસ્તાન પાસેથી બદલો લઈ શકે છે, પરંતુ આ માટે તેણે ફાઈનલ સુધી રાહ જોવી પડશે. બંને ટીમો સેમિફાઇનલમાં છે, પરંતુ અલગ-અલગ મેચમાં ગ્રુપ Aની ટીમો સામે ટકરાશે. આવી સ્થિતિમાં જો બંને સેમિફાઇનલ મેચ જીતી જાય છે તો ફાઇનલમાં બંને સામસામે આવી શકે છે.
ગ્રુપ Aની બે મેચ બાકી છે જે આજે એટલે કે 19મી નવેમ્બરે રમાશે. આ મેચોના પરિણામો બાદ ખબર પડશે કે આ ગ્રુપમાંથી કઈ બે ટીમ સેમિફાઈનલ માટે ક્વોલિફાય થશે. ગ્રુપ A ની ટોપર ટીમને પ્રથમ સેમિફાઇનલમાં ભારતનો સામનો કરવો પડશે, જ્યારે બીજી સેમિફાઇનલમાં પાકિસ્તાનની ટીમનો મુકાબલો ગ્રુપ Aની બીજા સ્થાને રહેલી ટીમ સાથે થશે. એક મેચ બાંગ્લાદેશ A અને શ્રીલંકા A વચ્ચે અને બીજી મેચ અફઘાનિસ્તાન A અને હોંગકોંગ વચ્ચે રમવાની છે, જે સેમિફાઇનલની ટીમો નક્કી કરશે.
ટોપ 4માં બાંગ્લાદેશનો એક પગ છે
જો બાંગ્લાદેશ A અને શ્રીલંકા A વચ્ચે રમાયેલી મેચમાં બાંગ્લાદેશની ટીમ જીતી જશે તો ટીમ સેમિફાઇનલમાં પહોંચી જશે, પરંતુ જો તે હારી જશે તો બંને ટીમોના પોઈન્ટ સમાન થઈ જશે. આવી સ્થિતિમાં નેટ રન રેટ પર વાત થશે. અત્યારે આ ગ્રુપમાં નેટ રન રેટમાં બાંગ્લાદેશ આગળ છે અને ટોપ 4માં જવાની શક્યતાઓ છે.આ સાથે જ અફઘાનિસ્તાન A પણ 4 પોઈન્ટ સુધી પહોંચી શકે છે, પરંતુ તેના માટે નેટ રન રેટ પણ મહત્વનો રહેશે, જ્યારે હોંગકોંગની ટીમ ટૂર્નામેન્ટમાંથી બહાર થઈ ગઈ છે. ગ્રુપ Bમાંથી UAE અને ઓમાનની ટીમોની સફર સમાપ્ત થઈ ગઈ છે.
