દક્ષિણ આફ્રિકાએ ભારત સામેની બીજી ટેસ્ટ મેચના પ્રથમ દાવમાં મોટો સ્કોર બનાવ્યો છે. પ્રથમ દિવસે 201ના સ્કોર સુધી ભારતીય બોલરોએ પાંચ વિકેટ ઝડપી હતી પરંતુ ત્યારપછી નીચલા ક્રમના બેટ્સમેનોએ જોરદાર પ્રદર્શન કરીને ટીમનો સ્કોર 489 સુધી પહોંચાડ્યો હતો.દક્ષિણ આફ્રિકાએ પ્રથમ દાવમાં આટલો મોટો સ્કોર બનાવ્યા બાદ હવે ભારત માટે મુશ્કેલીઓ વધવાની છે. કારણ કે ભારતીય ટીમ ટેસ્ટ ક્રિકેટના ઈતિહાસમાં એક મેચની પ્રથમ ઈનિંગમાં 450થી વધુ રન આપ્યા બાદ માત્ર ત્રણ વખત જ મેચ જીતવામાં સફળ રહી છે, જેના કારણે ભારત પર શ્રેણી ગુમાવવાનો ખતરો છે.
જે ત્રણ મેચમાં ભારતીય ટીમે પ્રથમ દાવમાં 450થી વધુ રન ગુમાવ્યા બાદ જીત મેળવી હતી તે તમામ ટેસ્ટ ક્રિકેટના ઈતિહાસમાં સુવર્ણ અક્ષરોમાં નોંધાયેલી છે. ભારતીય ટીમે પ્રથમ દાવમાં 450થી વધુ રન આપ્યા બાદ 2003માં પ્રથમ વખત જીત મેળવી હતી.
ભારત વિ ઓસ્ટ્રેલિયા- એડિલેડ (2003)
ઓસ્ટ્રેલિયા પ્રવાસ પર 2003-04 બોર્ડર-ગાવસ્કર ટ્રોફીની બીજી ટેસ્ટ એડિલેડ ઓવલ ખાતે રમાઈ હતી, જે ભારતીય ટેસ્ટ ઈતિહાસની સૌથી યાદગાર અને ઐતિહાસિક જીત બની હતી. ઓસ્ટ્રેલિયાએ ટોસ જીતીને પ્રથમ બેટિંગ કરવાનો નિર્ણય કર્યો હતો. કેપ્ટન રિકી પોન્ટિંગે 242 રનની જોરદાર ઇનિંગ રમી હતી. જેના કારણે ઓસ્ટ્રેલિયાએ પ્રથમ દાવમાં 556 રન બનાવ્યા હતા. અનિલ કુંબલેએ આ ઇનિંગમાં 5 વિકેટ લીધી હતી.
મોટા સ્કોરના દબાણમાં ભારતનો દાવ ખોરવાઈ ગયો અને ટીમે 100 રનની અંદર ચાર વિકેટ ગુમાવી દીધી. રાહુલ દ્રવિડ (233) અને વી.વી.એસ. લક્ષ્મણ (148)એ 5મી વિકેટ માટે 303 રનની ઐતિહાસિક ભાગીદારી કરી હતી, જેના કારણે ભારત પુનરાગમન કરવામાં સફળ રહ્યું હતું. ભારતે પ્રથમ દાવમાં 523 રન બનાવ્યા હતા. બીજી ઈનિંગમાં અજીત અગરકરે 6 વિકેટ લઈને ઓસ્ટ્રેલિયાના સ્કોર 196 સુધી પહોંચાડવામાં મહત્વની ભૂમિકા ભજવી હતી. ભારતને જીતવા માટે 230 રનનો ટાર્ગેટ મળ્યો હતો જે ભારતે 6 વિકેટ ગુમાવીને હાંસલ કરી લીધો હતો. બીજી ઇનિંગમાં પણ રાહુલ દ્રવિડ (72) એ ટીમ માટે સૌથી વધુ રન બનાવ્યા હતા.
ભારત વિ ઓસ્ટ્રેલિયા- બેંગલુરુ (2010)
ઓક્ટોબર 2010માં બેંગલુરુના એમ. ચિન્નાસ્વામી સ્ટેડિયમમાં ભારત અને ઓસ્ટ્રેલિયા વચ્ચે રમાયેલી બીજી ટેસ્ટ મેચ ખૂબ જ યાદગાર મેચ હતી. સચિન તેંડુલકરે બેવડી સદી ફટકારી હતી, જ્યારે ચેતેશ્વર પૂજારાએ ડેબ્યૂમાં જોરદાર પ્રદર્શન કર્યું હતું. ઓસ્ટ્રેલિયા માટે માર્ક્સ નોર્થે 128 રનની શાનદાર ઇનિંગ રમી હતી, જેના કારણે ઓસ્ટ્રેલિયાએ પ્રથમ ઇનિંગમાં 478 રન બનાવ્યા હતા. ભારતે પ્રથમ દાવમાં મુરલી વિજયની સદી (139) અને સચિન તેંડુલકરની (214) બેવડી સદીની મદદથી 495 રન બનાવ્યા હતા. ભારતીય બોલરોના જોરદાર પ્રદર્શનની મદદથી ઓસ્ટ્રેલિયાનો બીજો દાવ માત્ર 223 રનમાં સમેટાઈ ગયો હતો. ભારતને મેચ જીતવા માટે 207 રનનો ટાર્ગેટ મળ્યો હતો જેનો પીછો કરતા ચેતેશ્વર પૂજારા અને સચિને અડધી સદી ફટકારી હતી. ભારતે 45 ઓવરમાં 3 વિકેટ ગુમાવીને 207 રન બનાવીને મેચ જીતી લીધી હતી.
