બાંગ્લાદેશના પૂર્વ વડાપ્રધાન શેખ હસીનાના બેંક લોકરમાંથી લગભગ 850 તોલા સોનું મળવાના સમાચાર સામે આવ્યા છે. દેશના ભ્રષ્ટાચાર વિરોધી અધિકારીઓએ બુધવારે કહ્યું કે શેખ હસીનાના બેંક લોકરમાંથી લગભગ 10 કિલો સોનું મળી આવ્યું છે. આ સોનાની કિંમત લગભગ 1.3 મિલિયન ડોલર એટલે કે 11 કરોડ રૂપિયાથી વધુ હોવાનું કહેવાય છે.
બાંગ્લાદેશના નેશનલ બોર્ડ ઓફ રેવન્યુના સેન્ટ્રલ ઈન્ટેલિજન્સ સેલ (CIC)ના અધિકારીઓએ જણાવ્યું છે કે સપ્ટેમ્બરમાં જપ્ત કરાયેલ શેખ હસીનાનું લોકર ખોલ્યા બાદ આ માહિતી સામે આવી છે. “કોર્ટના આદેશ પછી, અમે લોકર ખોલ્યું અને ત્યાં લગભગ 10 કિલો સોનું મળ્યું,” સીઆઈસીના એક વરિષ્ઠ અધિકારીએ નામ ન આપવાની શરતે એએફપીને જણાવ્યું.
મળતી માહિતી મુજબ, જપ્ત કરાયેલી વસ્તુઓમાં સોનાના સિક્કા, બાર અને ઘરેણાંનો સમાવેશ થાય છે. તપાસ અધિકારીઓએ જણાવ્યું કે હસીનાએ ઓફિસમાં રહીને તેમને મળેલી કેટલીક ભેટો સરકારી તિજોરીમાં જમા કરાવી ન હતી. બાંગ્લાદેશના કાયદા અનુસાર, સરકારી ભેટોને ‘તોશાખાના’ એટલે કે તિજોરીમાં રાખવી જરૂરી છે.
તમને જણાવી દઈએ કે બાંગ્લાદેશી એજન્સીઓ પણ શેખ હસીના સામે કરચોરીના આરોપોની તપાસ કરી રહી છે અને એ પણ તપાસ કરવામાં આવી રહી છે કે શું હસીનાએ તેના ટેક્સ ફાઇલિંગમાં રિકવર થયેલા સોનાની માહિતી આપી હતી કે નહીં. આ મહિનાની શરૂઆતમાં ઇન્ટરનેશનલ ક્રાઇમ ટ્રિબ્યુનલે ગયા વર્ષે બાંગ્લાદેશમાં થયેલી હિંસા માટે હસીનાને ફાંસીની સજા સંભળાવી હતી. ગયા વર્ષે વિરોધ પ્રદર્શન બાદ હસીનાએ ભારતમાં આશરો લીધો છે.
