ભારતીય ટેસ્ટ અને વનડે ટીમના કેપ્ટન શુભમન ગિલનો આ વર્ષે સારો દેખાવ રહ્યો છે. સુકાનીપદ મળ્યા બાદ તેણે ટેસ્ટ ક્રિકેટમાં ધૂમ મચાવી છે. જો કે ટી20માં તેનું ફોર્મ હજુ પણ ચિંતાનો વિષય છે. વર્ષ 2025 માં, શુભમન ગીલે અત્યાર સુધીમાં તમામ ફોર્મેટમાં રમાયેલી 33 મેચોની 40 ઇનિંગ્સમાં 51.05ની એવરેજ સાથે 1736 રન બનાવ્યા છે, જેમાં 7 સદી અને 3 અડધી સદીનો સમાવેશ થાય છે. ગિલ આ વર્ષે અત્યાર સુધી સૌથી વધુ રન બનાવનાર બેટ્સમેન હતો, પરંતુ વેસ્ટ ઈન્ડિઝના શે હોપે તેને પછાડીને વેલિંગ્ટનમાં ન્યૂઝીલેન્ડ સામેની બીજી ટેસ્ટમાં નંબર-1નો તાજ મેળવ્યો છે.
શે હોપ પાસે હવે 2025માં સૌથી વધુ 1749 રન છે. વર્ષ 2025માં ટેસ્ટ, ODI અને T20 – ત્રણેય ફોર્મેટમાં સૌથી વધુ રન બનાવવાની રેસ હવે શે હોપ અને શુભમન ગિલ વચ્ચે છે. આ બંને સિવાય અત્યાર સુધી કોઈ 1600 રનના આંકડાને સ્પર્શી શક્યું નથી. હવે જોવાનું એ રહે છે કે આ વર્ષના અંત સુધીમાં કોણ જીતે છે.
શે હોપની વાત કરીએ તો ન્યૂઝીલેન્ડ સામે ચાલી રહેલી વેલિંગ્ટન ટેસ્ટમાં તેની એક ઇનિંગ બાકી છે, જ્યારે તેણે કિવી ટીમ સામે વધુ એક ટેસ્ટ મેચ રમવાની છે જ્યાં તેને વધુ બે વખત બેટિંગ કરવાની તક મળશે.
શુભમન ગિલ દક્ષિણ આફ્રિકા સામેની T20 શ્રેણીમાં ભારતીય ટીમનો ભાગ છે. આ વર્ષના અંત સુધીમાં, ભારતને મહેમાનો સાથે વધુ 4 T20 મેચ રમવાની છે, આવી સ્થિતિમાં ગિલ પાસે નંબર-1 માટે પોતાનો દાવો દાખવવાની 4 તકો હશે. જોકે, આ કામ તેમના માટે આસાન નથી.
