ઈન્ટરનેશનલ ક્રિકેટ કાઉન્સિલ અને મીડિયા જાયન્ટ JioStarએ તાજેતરમાં એક સંયુક્ત નિવેદન બહાર પાડીને મીડિયામાં ફરતી અટકળો અને સમાચાર પર પૂર્ણવિરામ મૂક્યું છે. વાયરલ રિપોર્ટમાં એવો દાવો કરવામાં આવી રહ્યો હતો કે જિયોસ્ટાર ભારતમાં ICC ઈવેન્ટ્સનું પ્રસારણ કરવાની ડીલ ખતમ કરવા માંગે છે. જો કે, જારી કરાયેલ સંયુક્ત નિવેદનમાં, ICC અને JioStarએ પુષ્ટિ કરી છે કે તેમની વચ્ચેનો મીડિયા અધિકાર કરાર મજબૂત અને અસરકારક છે.
આ નિવેદન મીડિયા અહેવાલો પછી આવ્યું છે જેમાં દાવો કરવામાં આવ્યો હતો કે કરારમાં કેટલીક નાણાકીય અથવા કાનૂની અડચણો ઊભી થઈ છે અથવા શરતોમાં ફેરફાર કરવામાં આવ્યો છે. બંને પક્ષોએ પુષ્ટિ કરી કે ICC ઇવેન્ટ્સ માટે મીડિયા અધિકારો સંબંધિત કરાર નિર્ધારિત શરતો અને સમયગાળા અનુસાર અમલમાં છે. નિવેદનમાં કહેવામાં આવ્યું છે કે બંને સંસ્થાઓ વૈશ્વિક ક્રિકેટ ચાહકોને શ્રેષ્ઠ સામગ્રી પ્રદાન કરવા માટે તેમની ભાગીદારીને આગળ વધારવા માટે પ્રતિબદ્ધ છે.
ICC T20 વર્લ્ડ કપ 2026 7 ફેબ્રુઆરીથી 8 માર્ચ દરમિયાન યોજાનાર છે, જેમાં ભારત અને શ્રીલંકા સંયુક્ત યજમાન છે. ભારતના ચાહકો Jiostar પર મેચનો આનંદ માણી શકશે. જિયોસ્ટારે 2024-27 માટે ભારતના મીડિયા અધિકારો માટે 2023માં ICC સાથે કરાર કર્યો હતો. આ ડીલ 2024-27 માટે ત્રણ અબજ ડોલર (લગભગ રૂ. 25 હજાર કરોડ)ની હતી.
JioStar એ ભારતનું અગ્રણી મીડિયા અને મનોરંજન પ્લેટફોર્મ છે. તેણે જુલાઈ-સપ્ટેમ્બર ક્વાર્ટરમાં રૂ. 7,232 કરોડની આવક અને રૂ. 1,322 કરોડનો નફો નોંધાવ્યો હતો. તેણે બે અગ્રણી OTT પ્લેટફોર્મ ‘JioCinema’ અને ‘Disney Star’ ના મર્જર પછી ફેબ્રુઆરી 2025 માં Jio-Hotstar લોન્ચ કર્યું હતું.
