વિદેશ મંત્રાલયે કેરળ ફિલ્મ ફેસ્ટિવલ 2025માં 6 ફિલ્મો બતાવવા પર સખત વાંધો વ્યક્ત કર્યો છે. આ પછી કેરળ ચાલચિત્ર એકેડમીએ 3 ફિલ્મો ન બતાવવાનો નિર્ણય લીધો છે. છમાંથી ત્રણ ફિલ્મો પહેલેથી જ બતાવવામાં આવી ચુકી છે. ગુરુવારે વિદેશ મંત્રાલયે કાનૂની કાર્યવાહીની ચેતવણી આપતાં કહ્યું હતું કે આ ફિલ્મો દેશની વિદેશ નીતિની વિરુદ્ધ છે અને રાષ્ટ્રીય સુરક્ષાને અસર કરી શકે છે.
સરકારને કઈ 6 ફિલ્મો સામે વાંધો છે?
વિદેશ મંત્રાલય દ્વારા જે છ ફિલ્મોને ન બતાવવાનો આદેશ આપવામાં આવ્યો છે તેના નામ છે ‘યસ’, ‘ઇગલ્સ ઓફ ધ રિપબ્લિક’, ‘એ પોએટ’, ‘ફ્લેમ્સ’, ‘ઓલ ધેટ્સ લેફ્ટ ઓફ યુ’ અને ‘ક્લેશ’. આમાંથી ઇગલ્સ ઓફ ધ રિપબ્લિક, ધ પોએટ અને ફ્લેમ્સ પહેલાથી જ બતાવવામાં આવી ચુક્યા છે. વિદેશ મંત્રાલયે કહ્યું છે કે સેન્સર બોર્ડને આ ફિલ્મો બતાવવાની પરવાનગી આપવામાં આવી ન હતી.
એકેડેમીના અધ્યક્ષ રેસુલ પુકુટ્ટીએ જણાવ્યું હતું કે આ નિર્ણય એકેડેમી દ્વારા લેવામાં આવ્યો હતો અને તેમાં કોઈપણ પ્રકારની રાજકીય દખલગીરી નથી. તેમણે જણાવ્યું હતું કે રાજ્ય સરકારે અગાઉ એકેડેમીને તમામ 19 ફિલ્મો દર્શાવવા વિનંતી કરી હતી જેના માટે કેન્દ્ર સરકારે પરવાનગી આપવાનો ઇનકાર કર્યો હતો. પુકુટ્ટીએ કહ્યું, “તેઓએ (કેન્દ્ર સરકારે) અમને કહ્યું કે સૂચિમાં 186 ફિલ્મોમાંથી 180 ફિલ્મોને પરવાનગી આપવામાં આવી છે. તેથી, અમે વધુ તણાવ પેદા કરવા માંગતા ન હતા અથવા એવું દેખાડવા માંગતા ન હતા કે કેરળના તમામ લોકો નિયમોનું ઉલ્લંઘન કરવા જઈ રહ્યા છે. તમને જણાવી દઈએ કે શુક્રવાર આ ફેસ્ટિવલનો છેલ્લો દિવસ છે. હવામાનને ધ્યાનમાં રાખીને, કેટલાક ફિલ્મના પ્રદર્શનના સ્થળમાં ફેરફાર કરવામાં આવ્યો હતો.
