સોમવારે કેરળની એક લોકપ્રિય મહિલા ‘ટ્રાવેલ વ્લોગરે’ દાવો કર્યો હતો કે અફઘાનિસ્તાનના બામિયાન શહેરમાં મુજાહિદ્દીન દ્વારા તેની ધરપકડ કરવામાં આવી છે. આ મહિલા વ્લોગર થોડા સમય પહેલા અફઘાનિસ્તાનના પ્રવાસે ગઈ હતી. ત્યાંથી તેણે તેના સોશિયલ મીડિયા પેજ પર ઘણા વીડિયો પણ પોસ્ટ કર્યા હતા. તેણે ભારતીય દૂતાવાસનો સંપર્ક કરવા મદદ માંગી છે. ‘બેકપેકર અરુણિમા’, તેના ફેસબુક પેજ પરની એક પોસ્ટમાં, સ્થાનિક સત્તાવાળાઓ તરફથી મળેલા કથિત સત્તાવાર સંદેશનું ભાષાંતર શેર કર્યું છે, જે મુજબ તેને અફઘાનિસ્તાનમાં મુજાહિદ્દીન દ્વારા ધરપકડ કરવામાં આવી છે.
અરુણિમાએ પોતાની પોસ્ટમાં ભારતીય દૂતાવાસનો સંપર્ક કરવા માટે મદદની વિનંતી પણ કરી હતી. અરુણિમાએ લખ્યું કે હું અફઘાનિસ્તાનમાં મુશ્કેલીમાં છું. હું બામિયાનમાં છું. જો કે, આ પોસ્ટની સત્યતાની સ્વતંત્ર રીતે પુષ્ટિ થઈ શકી નથી. આ ઘટનાક્રમ પર વિદેશ મંત્રાલય તરફથી તાત્કાલિક કોઈ પ્રતિક્રિયા આવી નથી. પોસ્ટમાં મહિલા વ્લોગરની કથિત ધરપકડના સંજોગો વિશે કોઈ વધુ વિગતો આપવામાં આવી નથી, કે તેણીને કોણે અટકાયતમાં લીધી છે તે પણ જણાવ્યું નથી.
ઉલ્લેખનીય છે કે અરુણિમા છેલ્લા કેટલાક દિવસોથી અફઘાનિસ્તાનમાં ફરતી હતી. તેણે પોતાના સોશિયલ મીડિયા પેજ પર અહીંથી ઘણા વીડિયો પણ પોસ્ટ કર્યા છે. અફઘાનિસ્તાનમાં ફરતી વખતે અરુણિમા પોતાના વીડિયોમાં તાલિબાન શાસનમાં અફઘાન મહિલાઓની સ્થિતિ, સ્થાનિક લોકોના ડર અને પ્રતિબંધો વિશે ખુલીને વાત કરી રહી હતી. તેણે ત્યાંથી તેના ઘણા ફોટા પણ અપલોડ કર્યા છે. આ તસવીરોમાં તે સ્થાનિક લોકો સાથે સમય પસાર કરતી જોવા મળી રહી છે.
