મુંબઈઃ રણવીર સિંહની ધુરંધર ફિલ્મે વર્ષ 2025નો ધમાકેદાર અંત કર્યો છે. રિલીઝના લગભગ ચાર અઠવાડિયા પછી પણ ફિલ્મની ગતિ ધીમી નથી થઈ રહી. આદિત્ય ધર દ્વારા દિગ્દર્શિત આ સ્પાય થ્રિલરે ભારતીય બોક્સ ઓફિસ તેમજ વિદેશી બજારોમાં રેકોર્ડ તોડ કમાણી કરી છે.
SACNILCના પ્રારંભિક ડેટા અનુસાર, 27માં દિવસે ધુરંધરે તમામ ભાષાઓમાં લગભગ રૂ. 10.50 કરોડનું ઈન્ડિયા નેટ કલેક્શન કર્યું. સામાન્ય રીતે ચોથા સપ્તાહમાં ફિલ્મોની કમાણી સિંગલ ડિજિટમાં આવી જાય છે, પરંતુ ધુરંધરે આ ટ્રેન્ડને સંપૂર્ણપણે બદલી નાખ્યો છે. આ સ્પષ્ટ સંકેત છે કે દર્શકોનો ક્રેઝ હજુ પણ બરકરાર છે.
27 દિવસ પછી પણ ધુરંધરે સારું કલેક્શન કર્યું
ફિલ્મે પ્રથમ સપ્તાહમાં કુલ 207.25 કરોડ રૂપિયાની કમાણી કરી હતી. બીજા સપ્તાહમાં પણ તેનું વર્ચસ્વ ચાલુ રહ્યું અને કલેક્શન 253.25 કરોડ રૂપિયા સુધી પહોંચી ગયું. ત્રીજા સપ્તાહમાં ગતિ થોડી ધીમી પડી હોવા છતાં પણ રૂ. 172 કરોડનો બિઝનેસ કરવો એ મોટી સિદ્ધિ ગણાય છે. ચોથા સપ્તાહમાં અત્યાર સુધી ફિલ્મે 90.25 કરોડ રૂપિયાની કમાણી કરી લીધી છે.
27માં દિવસની કમાણી સાથે, ધુરંધરનું કુલ ઈન્ડિયા નેટ કલેક્શન લગભગ 722.75 કરોડ રૂપિયા સુધી પહોંચી ગયું છે. જ્યારે ભારતનું ગ્રોસ કલેક્શન 867.3 કરોડ રૂપિયા પર પહોંચી ગયું છે. આ આંકડા તેને ભારતીય બોક્સ ઓફિસ ઈતિહાસની સૌથી મોટી ફિલ્મોની યાદીમાં ટોચ પર લઈ જાય છે.
પરદેશમાં પણ ધુરંધરનો પ્રભાવ
ભારત સિવાય આ ફિલ્મે વિદેશી બજારમાં પણ જોરદાર કમાણી કરી છે. રિપોર્ટ્સ અનુસાર, ધુરંધરે વિદેશમાં લગભગ 246 કરોડ રૂપિયાનો બિઝનેસ કર્યો છે. આ સાથે જ ફિલ્મનું વર્લ્ડવાઈડ બોક્સ ઓફિસ કલેક્શન 1113.3 કરોડ રૂપિયાની આસપાસ પહોંચી ગયું છે. આ આંકડા સાથે તે અત્યાર સુધીની સૌથી વધુ કમાણી કરનાર હિન્દી ફિલ્મ બની ગઈ છે.
જો ફિલ્મ ગુરુવારે પણ ડબલ ડિજિટની કમાણી કરવામાં સફળ રહેશે તો ચોથા સપ્તાહમાં ધુરંધર 100 કરોડનો આંકડો પાર કરી જશે. આ એક એવો રેકોર્ડ હશે જે આજ સુધી કોઈ હિન્દી ફિલ્મે હાંસલ કરી નથી. આ પહેલા આ રેકોર્ડ પુષ્પા ધ રૂલ પાર્ટ 2ના નામે હતો જેણે ચોથા સપ્તાહમાં 53.75 કરોડ રૂપિયાની કમાણી કરી હતી.
