અમેરિકી રાષ્ટ્રપતિ ડોનાલ્ડ ટ્રમ્પે રવિવારે એક યાદી જાહેર કરી જેમાં તે દેશોના નામ છે જ્યાંથી અમેરિકી સરકાર ઇમિગ્રન્ટ્સને મદદ કરી રહી છે અને તેમને અનેક પ્રકારની સુવિધાઓ પૂરી પાડી રહી છે. ભારતના ઘણા પડોશી દેશોના નામ 120 દેશોની યાદીમાં છે પરંતુ ભારતનું નામ નથી. આ યાદીમાં પાકિસ્તાન, ભૂટાન, નેપાળ, ચીન અને બાંગ્લાદેશના નામ સામેલ છે. ડોનાલ્ડ ટ્રમ્પે પોતાના ટ્રુથ સોશિયલ પ્લેટફોર્મ પર આ ચાર્ટ શેર કર્યો છે. આ યાદીમાં જણાવવામાં આવ્યું છે કે કયા દેશના પ્રવાસીઓને કેટલા ટકા મદદ આપવામાં આવી રહી છે.
ચાર્ટ મુજબ, બાંગ્લાદેશથી આવેલા 54.8 ટકા માઇગ્રન્ટ્સને અમેરિકન સરકાર દ્વારા સુવિધાઓ આપવામાં આવી રહી છે. આ સિવાય પાકિસ્તાનના 40.2 ટકા, નેપાળના 34.8 ટકા અને ચીનના 32.9 ટકા લોકોને મદદ આપવામાં આવી છે. ઇઝરાયેલના 25 ટકા ઇમિગ્રન્ટ્સ અને યુક્રેનના 42 ટકા ઇમિગ્રન્ટ્સને આ સુવિધા મળે છે. એવું પણ કહેવામાં આવ્યું છે કે એશિયાના અન્ય 38 ટકા માઇગ્રન્ટ્સને મદદ પૂરી પાડવામાં આવશે. આમાં કોઈ દેશના નામનો ઉલ્લેખ કરવામાં આવ્યો નથી.
પ્યુ રિસર્ચ સેન્ટરના રિપોર્ટ અનુસાર અમેરિકામાં રહેતા એશિયન ઈમિગ્રન્ટ્સમાં ભારત બીજા ક્રમે છે. આંકડા અનુસાર, અમેરિકામાં રહેતા કુલ એશિયન ઈમિગ્રન્ટ્સમાં ભારતીયોની સંખ્યા 21 ટકા છે. જ્યારે 2023માં અમેરિકામાં રહેતા ભારતીય મૂળના લોકોની સરેરાશ વાર્ષિક આવક $151,200 હતી. અહીં રહેતા ભારતીય ઈમિગ્રન્ટ્સની આવક અમેરિકામાં જન્મેલા ભારતીય મૂળના લોકોની આવક કરતાં વધુ હતી. અમેરિકામાં રહેતા એશિયનોની સરેરાશ વાર્ષિક આવક $52,400 હતી જ્યારે ભારતીયોની વાર્ષિક આવક $85,300 હતી.
તમને જણાવી દઈએ કે અમેરિકામાં ડોનાલ્ડ ટ્રમ્પની સરકાર બન્યા બાદ ઈમિગ્રેશનના નિયમો ઘણા કડક થઈ ગયા છે. મોટી સંખ્યામાં ભારતીય ઈમિગ્રન્ટ્સને પણ દેશનિકાલ કરવામાં આવ્યા છે. સાથે જ H-1B વિઝા માટેના નિયમો પણ કડક બનાવવામાં આવ્યા છે. H-1B વિઝા પર મોટી સંખ્યામાં ભારતીયો નોકરી માટે અમેરિકા જાય છે. આ સિવાય ડોનાલ્ડ ટ્રમ્પે પણ ભારત પર 50 ટકા ટેરિફ લાદી છે. બંને દેશો વચ્ચેનો વેપાર સોદો હજુ સુધી ફાઈનલ થયો નથી.
