મહેબૂબ ખાન ઝિમ્બાબ્વે અને નામિબિયામાં 15 જાન્યુઆરીથી શરૂ થઈ રહેલા 50 ઓવરના અંડર-19 વર્લ્ડ કપમાં અફઘાનિસ્તાનની કેપ્ટનશીપ કરશે. મહેબૂબ ખાનને યુવા વનડે સ્તરે અફઘાનિસ્તાન ટીમ સાથે ઘણો અનુભવ છે. તેણે 2024 અને 2025ની એશિયા કપ ટુર્નામેન્ટમાં પોતાના દેશનું નેતૃત્વ કર્યું છે અને તેને સ્પિન-બોલિંગ પ્રતિભાથી ભરપૂર ટીમની કમાન સોંપવામાં આવી છે.
બોલિંગ આક્રમણમાં સૌથી ખાસ નામ વહિદુલ્લા ઝદરાનનું છે. આ 18 વર્ષીય ઓફ-સ્પિનરની ક્ષમતા એ હકીકત પરથી સ્પષ્ટ થાય છે કે તે ગયા વર્ષે ILT20 ટૂર્નામેન્ટમાં ગલ્ફ જાયન્ટ્સ માટે સિનિયર લેવલની ક્રિકેટ રમી ચૂક્યો છે. તેણે ડિસેમ્બરમાં આઈપીએલની હરાજી માટે પોતાનું નામ પણ મૂક્યું હતું, પરંતુ તેને કોઈ ખરીદનાર મળ્યો ન હતો. વહિદુલ્લાહને ડાબોડી સ્પિનર ઝૈતુલ્લાહ શાહીન અને લેગ સ્પિનર હાફિઝ ઝદરાન સપોર્ટ કરશે.
ખાલિદ અહેમદઝાઈના નામે ફર્સ્ટ ક્લાસ સદી છે અને ઉઝૈરુલ્લા નિયાઝી ટીમના સૌથી આશાસ્પદ બેટ્સમેનોમાંના એક છે. અફઘાનિસ્તાને ગયા વર્ષે એશિયા ક્વોલિફાયર જીતીને અંડર-19 વર્લ્ડ કપમાં પોતાનું સ્થાન નિશ્ચિત કર્યું હતું. અફઘાનિસ્તાન અંડર-19 વર્લ્ડ કપના ગ્રુપ ડીમાં દક્ષિણ આફ્રિકા, તાન્ઝાનિયા અને વેસ્ટ ઈન્ડિઝ સાથે છે. આ ટુર્નામેન્ટ 50-50 ઓવરની હશે.
અંડર-19 વર્લ્ડ કપ માટે અફઘાનિસ્તાનની ટીમ: મહેબૂબ ખાન (કેપ્ટન), ખાલિદ અહમદઝાઈ, ઉસ્માન સદાત, ફૈઝલ ખાન, ઉઝૈરુલ્લા નિયાઝી, અઝીઝ મિયાં ખિલ, નઝીફ અમીરી, ખાતિર સ્ટેનિકઝાઈ, નુરિસ્તાની ઉમરઝાઈ, અબ્દુલ અઝીઝ, સલામ ખાન, વહિદુલ્લાહ ઝદરાન, ઝૈતુલ્લાહ શાહીન, રોહુલ્લાહ અરબ અને હાફેઝુલ્લાહ અરબ.
