ભારત અને ન્યુઝીલેન્ડ વચ્ચે ત્રણ મેચની વનડે સીરીઝની પ્રથમ મેચ રવિવારે રમાશે. ભારતીય ટીમના કેપ્ટન શુભમન ગિલ અને વાઇસ કેપ્ટન શ્રેયસ અય્યર વાપસી કરી રહ્યા છે. ગિલ ઈજાના કારણે આફ્રિકા સામેની શ્રેણીમાં ટીમનો ભાગ નહોતો, જ્યારે શ્રેયસ અય્યર ઓસ્ટ્રેલિયા સામેની ઈજા બાદ પ્રથમ વખત ભારત તરફથી રમશે. બંને સ્ટાર બેટ્સમેન પાસે ન્યૂઝીલેન્ડ સામેની વનડે શ્રેણીમાં મોટી સિદ્ધિ હાંસલ કરવાની તક હશે.
ભારતીય ODI ટીમનો વાઇસ કેપ્ટન શ્રેયસ અય્યર ODIમાં 3,000 રન પુરા કરવાની નજીક છે. આ માઈલસ્ટોન હાંસલ કરવા માટે તેને 83 રનની જરૂર છે. તેણે 67 ઇનિંગ્સ રમી છે. જો તે ન્યુઝીલેન્ડ સામેની વનડે સીરીઝ દરમિયાન ત્રણ હજાર રન પૂરા કરી લે છે તો તે ઈનિંગ્સના સંદર્ભમાં આ આંકડો સુધી પહોંચનાર સૌથી ઝડપી ભારતીય બેટ્સમેન બની જશે. તે શિખર ધવનનો રેકોર્ડ તોડશે જેણે 72 ઇનિંગ્સમાં આ સિદ્ધિ મેળવી હતી.
જો શ્રેયસ અય્યર પહેલી જ ODIમાં આ માઈલસ્ટોન હાંસલ કરશે તો તે 3,000 ODI રન બનાવનાર સંયુક્ત ત્રીજો સૌથી ઝડપી બેટ્સમેન બની જશે અને પાકિસ્તાનના બાબર આઝમની બરાબરી કરશે. વનડેમાં સૌથી ઝડપી ત્રણ હજાર રન પૂરા કરવાનો રેકોર્ડ દક્ષિણ આફ્રિકાના પૂર્વ ક્રિકેટર હાશિમ અમલાના નામે છે. તેણે માત્ર 57 ઇનિંગ્સમાં આ આંકડો પાર કર્યો હતો.
ભારતીય કેપ્ટન શુભમન ગિલ પણ વનડેમાં ત્રણ હજાર રન પૂરા કરવાની નજીક છે. શુભમન ગિલને આ સ્થાન સુધી પહોંચવા માટે 182 રનની જરૂર છે. ગિલે 58 મેચ રમી છે. જો તે આ શ્રેણી દરમિયાન આમ કરવામાં સફળ થાય છે, તો તે સૌથી ઓછી ઇનિંગ્સ અથવા મેચમાં ત્રણ હજારનો આંકડો પાર કરનાર ભારતીય બેટ્સમેન બની જશે. આવું કરનાર તે હાશિમ અમલા બાદ બીજો બેટ્સમેન બની જશે.
ગિલને આવતા મહિને ટી20 વર્લ્ડ કપ માટે પસંદ કરવામાં આવ્યો ન હતો પરંતુ 26 વર્ષીય ખેલાડી રમતના અન્ય બે આંતરરાષ્ટ્રીય ફોર્મેટમાં ભારતનું નેતૃત્વ કરવાનું ચાલુ રાખશે. ગિલે ભારત માટે 36 T20 આંતરરાષ્ટ્રીય મેચોમાં 869 રન બનાવ્યા છે. આ સમયગાળા દરમિયાન તેની સરેરાશ 28.03 હતી અને સ્ટ્રાઈક રેટ 138.59 હતો. ન્યુઝીલેન્ડ સામેની ત્રણ મેચની શ્રેણીની શરૂઆતની ODI પહેલા ગિલે કહ્યું, “મારું માનવું છે કે મારે જ્યાં હોવું જોઈએ ત્યાં હું છું. મારા નસીબમાં જે લખ્યું છે, તેને કોઈ મારાથી છીનવી નહીં શકે.
