પિતા અને પુત્ર બંને ક્રિકેટર હોવાના ઘણા ઉદાહરણો છે, પરંતુ પિતા અને પુત્ર એક જ ટીમમાં સાથે રમતા હોય તેવું કોઈ ઉદાહરણ નથી. આંતરરાષ્ટ્રીય ક્રિકેટમાં અત્યાર સુધી આવું બન્યું નથી પરંતુ હવે લીગ ક્રિકેટમાં આવો દુર્લભ સંયોગ બન્યો છે. આ દુર્લભ સંયોગ અફઘાનિસ્તાનના દિગ્ગજ ક્રિકેટર મોહમ્મદ નબી અને તેના પુત્ર હસન ઈસાખિલ સાથે જોડાયેલો છે. આ બંને BPLમાં એક જ ટીમ માટે ન માત્ર રમ્યા પરંતુ 50 રનની ભાગીદારી પણ કરી હતી.
41 વર્ષીય નબી અને તેનો 19 વર્ષીય પુત્ર ઈસાખિલ બંને નોઆખલી એક્સપ્રેસ ટીમમાં છે. સિલહટ ઈન્ટરનેશનલ ક્રિકેટ સ્ટેડિયમમાં ઢાકા કેપિટલ્સ સામે રમાયેલી મેચમાં બંનેએ માત્ર 30 બોલમાં 53 રનની ભાગીદારી કરી હતી.
નોઆખલી એક્સપ્રેસે પ્રથમ બેટિંગ કરતા 20 ઓવરમાં 7 વિકેટ ગુમાવીને 184 રન બનાવ્યા હતા. ટીમ તરફથી ઓપનર હસન ઈસાખિલે સૌથી વધુ સ્કોર બનાવ્યો હતો. તેણે 60 બોલમાં 92 રનની ઇનિંગ રમી હતી અને આ દરમિયાન તેણે 7 ફોર અને 5 સિક્સર ફટકારી હતી. ઈસાખિલ અને સૌમ્ય સરકાર વચ્ચે પ્રથમ વિકેટ માટે 101 રનની ભાગીદારી થઈ હતી. નોઆખલી એક્સપ્રેસે 19 રનના ગાળામાં 3 વિકેટ ગુમાવી દીધી હતી, ત્યારબાદ મોહમ્મદ નબી બેટિંગ કરવા આવ્યો હતો.
ચોથી વિકેટ માટે મોહમ્મદ નબી અને તેના પુત્ર ઈસાખિલ વચ્ચે માત્ર 30 બોલમાં 53 રનની ભાગીદારી થઈ હતી. નબી 13 બોલમાં 17 રન બનાવીને આઉટ થયો હતો. તેણે 2 ચોગ્ગા ફટકાર્યા હતા.
