(તસવીરોઃ જયેશ મોદી) અમદાવાદ: ગુજરાતીઓના પ્રિય તહેવાર ઉત્તરાયણને હવે ગણતરીના કલાકો જ બાકી છે, ત્યારે અમદાવાદના પતંગ બજારોમાં ભભક જોવા મળી રહી છે. ખાસ કરીને પતંગો માટે વિશ્વવિખ્યાત એવા રાયપુર દરવાજા બજારમાં સોમવારે મોડી રાત્રે ખરીદીનો માહોલ ચરમસીમાએ પહોંચ્યો હતો. શહેરીજનો મોટી સંખ્યામાં પતંગ અને માંજો ખરીદવા માટે ઉમટી પડ્યા હતા, જેના કારણે સમગ્ર રાયપુર વિસ્તાર ‘કાઈટ ફીવર’માં ડૂબેલો જોવા મળ્યો હતો.
મોડી રાત સુધી ધમધમ્યું બજાર રાયપુર દરવાજા તેની પરંપરાગત પતંગો અને મજબૂત દોરી (માંજો) માટે જાણીતું છે. ગઈકાલે રાત્રે અહીં પગ મૂકવાની પણ જગ્યા નહોતી. બાળકોથી લઈને મોટેરાઓ સુધીના તમામ લોકો પોતાની મનપસંદ પતંગોની પસંદગી કરતા નજરે પડ્યા હતા.
વેપારીઓના જણાવ્યા અનુસાર, ઓફિસ અને કામકાજ પતાવ્યા બાદ લોકો રાત્રિના સમયે ખરીદી કરવાનું વધુ પસંદ કરે છે, જેના કારણે રાત્રે ૧૨-૧ વાગ્યા સુધી બજારમાં રોનક જોવા મળે છે.
આ વર્ષે બજારમાં વિવિધ થીમ આધારિત પતંગોનું આગમન થયું છે.
ભારે ભીડને કારણે રાયપુર દરવાજા અને તેની આસપાસના વિસ્તારોમાં ટ્રાફિક જામની સ્થિતિ સર્જાઈ હતી. જોકે, ઉત્તરાયણનો થનગનાટ એટલો વધુ હતો કે લોકો ટ્રાફિકની પરવા કર્યા વગર પણ ઉત્સાહપૂર્વક ખરીદી કરતા જોવા મળ્યા હતા. ખાન-પાનની લારીઓ અને દુકાનો પણ મોડી રાત સુધી ચાલુ રહેતા બજારમાં મેળાવડા જેવો માહોલ સર્જાયો હતો.
