અફઘાનિસ્તાનની રાજધાની કાબુલમાં સોમવારે જોરદાર વિસ્ફોટ થયો હતો. આ વિસ્ફોટમાં ઓછામાં ઓછા સાત લોકોના મોત થયા છે અને 13 લોકો ઘાયલ થયા છે. તમામ ઘાયલોને સ્થાનિક હોસ્પિટલમાં સારવાર આપવામાં આવી રહી છે. એવું જણાવવામાં આવ્યું હતું કે વિસ્ફોટ શહેર-એ-નાવ વિસ્તારની એક હોટલમાં થયો હતો, જે વિદેશી નાગરિકો માટે રહેવાનું મુખ્ય સ્થળ છે અને કાબુલના સૌથી સુરક્ષિત વિસ્તારોમાંથી એક માનવામાં આવે છે. તાલિબાનના ગૃહ મંત્રાલયે આ વાતની પુષ્ટિ કરી છે.
પ્રવક્તા ખાલેદ ઝદરાને જણાવ્યું હતું કે વિસ્ફોટ શહેર-એ-નૌ જિલ્લામાં એક હોટલમાં થયો હતો, જેમાં ઘણી જાનહાનિ થઈ હતી. ગૃહ મંત્રાલયના પ્રવક્તા અબ્દુલ મતીન કાનીએ જણાવ્યું કે વિસ્ફોટમાં સાત લોકોના મોત થયા છે અને 13 લોકો ઘાયલ થયા છે. તેમણે કહ્યું કે વિસ્ફોટના કારણની તપાસ હજુ ચાલુ છે. માહિતી આવ્યા બાદ જ કંઈક કહી શકાશે.
અહેવાલ અનુસાર, સ્થળ પર હાજર લોકોએ જોરદાર ધડાકો સાંભળ્યો અને સ્થળ પરથી ધુમાડો નીકળતો જોયો. જણાવવામાં આવી રહ્યું છે કે વિસ્ફોટ બાદ ઘટનાસ્થળ અને આસપાસના વિસ્તારમાં નાસભાગ મચી ગઈ હતી અને અરાજકતાનો માહોલ સર્જાયો હતો. અધિકારીઓએ જણાવ્યું કે વિસ્ફોટના સમાચાર મળતાની સાથે જ સુરક્ષા દળોએ સમગ્ર વિસ્તારને ઘેરી લીધો હતો. તેમજ તપાસ એજન્સીઓ વિસ્ફોટના કારણની તપાસ કરી રહી છે.
હાલમાં આ ઘટનામાં કોણ સામેલ છે તે જણાવવામાં આવ્યું નથી, પરંતુ આ વિસ્ફોટમાં ઈસ્લામિક સ્ટેટ-ખોરસન (ISIS-K) સામેલ હોવાની આશંકા વ્યક્ત કરવામાં આવી રહી છે. જોકે, ISIS-Kએ હજુ સુધી વિસ્ફોટની જવાબદારી લીધી નથી.
