Vadodara Fake PSI Arrested: ગુજરાતમાં ફરી એકવાર એક ચોંકાવનારો કિસ્સો સામે આવ્યો છે. રાજ્યના વડોદરામાં ગુજરાત પોલીસના સ્પેશિયલ ઓપરેશન ગ્રુપ (SOG) એ એક નકલી પોલીસ સબ ઇન્સ્પેક્ટર (PSI) ને ઝડપી પાડ્યો છે. તે પોતાને પોલીસ સબ-ઇન્સ્પેક્ટર ગણાવતો હતો અને તેની પાસેથી નકલી આઈડી કાર્ડ, વર્દી, સરકારી સિક્કાઓ અને વાહનો જપ્ત કરવામાં આવ્યા છે, જેનાથી એક શંકાસ્પદ છેતરપિંડીના રેકેટનો પર્દાફાશ થયો છે. વડોદરા પોલીસના ડીસીપી ઝોન-૨ મંજીતા વંજારાના જણાવ્યા અનુસાર આ શખ્સ જમીનના મોટા-મોટા સોદા કરતો હતો.
પિસ્તોલની જગ્યાએ રાખી હતી એરગન
વડોદરા પોલીસના જણાવ્યા અનુસાર સિટી સ્પેશિયલ ઓપરેશન્સ ગ્રુપ (SOG) એ મંગળવારે એક ૩૮ વર્ષીય વ્યક્તિની ધરપકડ કરી હતી, જે વડોદરાના તાંદલજા વિસ્તારમાં એક આલીશાન બંગલામાંથી પોતાને પોલીસ સબ-ઇન્સ્પેક્ટર તરીકે ઓળખાવતો હતો. આરોપીની ઓળખ મોબીન સોદાગર તરીકે થઈ છે. દરોડા દરમિયાન પોલીસે નકલી PSI ઓળખ પત્ર, પોલીસની વર્દી, સરકારી સિક્કાઓ, અનેક ઓળખના દસ્તાવેજો, નંબર પ્લેટ વગરના વાહનો અને એક એર ગન જપ્ત કરી છે. વડોદરા પોલીસના ડીસીપી મંજીતા વંજારાના જણાવ્યા અનુસાર આ કાર્યવાહી SOG પોલીસ ઇન્સ્પેક્ટર એસ.ડી. રાતડાની આગેવાનીમાં કરવામાં આવી હતી. રાતડાને એક બાતમી મળી હતી કે એક વ્યક્તિ પોલીસ સબ-ઇન્સ્પેક્ટર બનીને શહેરમાં રોફ જમાવે છે. રાતડાને ગયા વર્ષે ડિસેમ્બરમાં સારા કામ બદલ ડીજીપી દ્વારા સન્માનિત કરવામાં આવ્યા હતા.
પત્નીએ ખોલ્યો દરવાજો
જ્યારે એસઓજીની ટીમ બંગલે પહોંચી ત્યારે દરવાજો આરોપીની પત્નીએ ખોલ્યો હતો. તેના પતિ વિશે પૂછવામાં આવતા તેણે જવાબ આપ્યો કે તે ઘરે જ છે, તેને એ વાતનો અંદાજ નહોતો કે ટૂંક સમયમાં જ છેતરપિંડીનો ખુલાસો થઈ જશે. ઘરની અંદર પોલીસને સોદાગર મળ્યો, જ્યારે કમ્પાઉન્ડની અંદર ઉભેલી બે ફોર-વ્હીલર ગાડીઓએ વધુ શંકા પેદા કરી. આ બંને ગાડીઓ પર નંબર પ્લેટ નહોતી. ગાડીઓની તપાસ કરતા અધિકારીઓને પોલીસની ખાકી વર્દી, નકલી PSI આઈડી કાર્ડ અને અંદર રાખેલા સરકારી દેખાતા સિક્કાઓ મળી આવ્યા હતા. SOG એ જેપી રોડ પોલીસ સ્ટેશનમાં છેતરપિંડી, બનાવટ, ઓળખ છુપાવવી અને ગુનાહિત વિશ્વાસઘાતનો ગુનો નોંધ્યો છે, કારણ કે આરોપીએ પોતાને ખોટા સરકારી કર્મચારી તરીકે રજૂ કર્યો હતો.
