અમેરિકાના જ્યોર્જિયામાં પારિવારિક વિવાદ ચાર લોકોની હત્યાનું કારણ બન્યો હતો. આ સમગ્ર ઘટના પાછળ એક ખૂબ જ દર્દનાક કહાની સામે આવી છે. 51 વર્ષીય આરોપીએ ઘરેલુ વિવાદને પગલે તેની પત્ની અને અન્ય ત્રણ સંબંધીઓને ગોળી મારી હતી. પોલીસે તેની ધરપકડ કરી છે. ગ્વિનેટ કાઉન્ટી પોલીસે શુક્રવારે સોશિયલ મીડિયા પોસ્ટમાં જણાવ્યું હતું કે વિજય કુમાર નામના વ્યક્તિએ તેની પત્ની મીમુ ડોગરા (43), સંબંધીઓ ગૌરવ કુમાર, નિધિ ચંદર અને હરીશ ચંદરને ગોળી મારીને હત્યા કરી હતી.
તે દિવસે શું થયું?
પોલીસે જણાવ્યું કે તે દિવસે કુમાર અને ડોગરા વચ્ચે તેમના એટલાન્ટાના નિવાસસ્થાનમાં ઝઘડો થયો હતો. આ પછી તેઓ બધા તેમના એક સંબંધી બ્રુક આઇવીના ઘરે ગયા. તેમનો 12 વર્ષનો પુત્ર પણ તેમની સાથે હતો. અહીં જ ગૌરવ, નિધિ અને હરીશ રહેતા હતા. તેમની સાથે સાત અને 10 વર્ષનું બાળક પણ રહેતું હતું. શૂટિંગ પછી, કુમારના પુત્રએ સૌથી પહેલા 911 પર ફોન કર્યો હતો.
ત્રણેય બાળકો અલમારીમાં સંતાયા હતા
પોલીસે જણાવ્યું હતું કે બાળકીને કંઈ ખબર ન હતી કે તેમની વચ્ચે શું વિવાદ હતો અને તેઓ અહીં શા માટે આવ્યા હતા. જ્યારે પોલીસ ત્યાં પહોંચી તો ત્યાં ચાર મૃતદેહ પડેલા હતા. ઘરની અંદર માત્ર ત્રણ જ બાળકો હતા જેઓ અલમારીમાં સંતાયા હતા. પોલીસે જણાવ્યું કે આ ઘટના પાછળનું કારણ હજુ જાણી શકાયું નથી. ગોળીબારની ઘટના પર શોક વ્યક્ત કરતા, એટલાન્ટામાં ભારતીય વાણિજ્ય દૂતાવાસે કહ્યું કે કથિત હુમલાખોરની ધરપકડ કરવામાં આવી છે અને પીડિત પરિવારને તમામ શક્ય સહાય પૂરી પાડવામાં આવી રહી છે.
ભારતીય કોન્સ્યુલેટે સોશિયલ મીડિયા પ્લેટફોર્મ ‘X’ પર પોસ્ટ કર્યું, “અમે કથિત પારિવારિક વિવાદથી સંબંધિત ફાયરિંગની ઘટનાથી ખૂબ જ દુઃખી છીએ.” આ ઘટનામાં માર્યા ગયેલાઓમાં એક ભારતીય નાગરિક પણ સામેલ છે. કથિત હુમલાખોરની ધરપકડ કરવામાં આવી છે અને પીડિતાના પરિવારને શક્ય તમામ મદદ પૂરી પાડવામાં આવી રહી છે. આરોપી કુમાર પર ઉગ્ર હુમલો, હત્યા, દુર્ભાવનાપૂર્ણ ઈરાદાથી હત્યા અને બાળકો પ્રત્યે ક્રૂરતાનો આરોપ મૂકવામાં આવ્યો છે.
