તાજેતરમાં, માર્ક કાર્ને વર્લ્ડ ઇકોનોમિક ફોરમના મંચ પર અમેરિકાની દાદાગીરીને સીધો પડકાર ફેંકીને ચર્ચામાં આવ્યા હતા. જો કે હવે અમેરિકી રાષ્ટ્રપતિ ડોનાલ્ડ ટ્રમ્પના પગલાથી કેનેડાને પીછેહઠ કરવાની ફરજ પડી છે. હકીકતમાં, ડોનાલ્ડ ટ્રમ્પે તાજેતરમાં કેનેડાને ચેતવણી આપી હતી કે જો કેનેડા ચીન સાથે વેપાર કરાર પર હસ્તાક્ષર કરશે તો યુએસ કેનેડા પર 100 ટકા ટેરિફ લાદશે. આ પછી કેનેડાના પીએમનું મોટું નિવેદન સામે આવ્યું છે. માર્ક કાર્નેએ રવિવારે કહ્યું કે તેમનો દેશ ચીન સાથે મુક્ત વેપાર સોદો કરવાનો કોઈ ઈરાદો નથી.
ટ્રમ્પની ધમકી બાદ કેનેડાના વડા પ્રધાને કહ્યું કે યુએસ અને મેક્સિકો સાથે મુક્ત વેપાર કરાર હેઠળ કેનેડા નોટિસ વિના કોઈપણ બિન-બજાર અર્થતંત્ર ધરાવતા દેશો સાથે મુક્ત વેપાર કરાર કરી શકે નહીં. કાર્નેએ કહ્યું, “ચીન અથવા અન્ય કોઈ બિન-બજાર અર્થવ્યવસ્થા ધરાવતા દેશ સાથે આવું કરવાનો અમારો કોઈ ઈરાદો નથી. અમે માત્ર ચીન સાથે છેલ્લા કેટલાક વર્ષોમાં ઊભી થયેલી કેટલીક સમસ્યાઓને ઠીક કરવાનો પ્રયાસ કરી રહ્યા છીએ.”
ટ્રમ્પે વીડિયો શેર કર્યો છે
દરમિયાન, ટ્રમ્પે રવિવારે એક વીડિયો પોસ્ટ કર્યો જેમાં કેનેડિયન વ્હીકલ મેન્યુફેક્ચરર્સ એસોસિએશનના ચીફ એક્ઝિક્યુટિવ ચેતવણી આપે છે કે કેનેડિયન ઓટો ઉદ્યોગ યુએસ વિના ટકી શકશે નહીં. ટ્રમ્પે વીડિયોની સાથે સોશિયલ મીડિયા પર લખ્યું, “જુઓ. કેનેડા જાણીજોઈને પોતાને બરબાદ કરી રહ્યું છે. ચીન સાથેનો સોદો તેમના માટે આપત્તિ સમાન છે. આ ઈતિહાસના સૌથી ખરાબ સોદાઓમાંથી એક હશે. હું ઈચ્છું છું કે કેનેડા ટકી રહે અને વિકાસ કરે!”
100 ટકા ટેરિફ લાદવાની ધમકી
આ પહેલા શનિવારે ટ્રમ્પે કેનેડા પર 100 ટકા ટેરિફ લાદવાની ધમકી આપી હતી. એક પોસ્ટમાં, ટ્રમ્પે કહ્યું કે જો કાર્ને એવું વિચારે છે કે તેઓ કેનેડાને ચીન માટે ‘ડ્રોપ ઓફ પોર્ટ’ બનાવવા જઈ રહ્યા છે જેથી ચીન અમેરિકામાં સામાન અને ઉત્પાદનો મોકલી શકે, તો તે એક મોટી ભૂલ કરી રહ્યા છે.
