ઈંગ્લેન્ડના ટેસ્ટ કેપ્ટન બેન સ્ટોક્સને ક્રિકેટ બોલ સાથે રમતી વખતે ગંભીર ઈજા થઈ છે. બેન સ્ટોક્સને ટ્રેનિંગ સેશન દરમિયાન આ ઈજા થઈ હતી. બેન સ્ટોક્સે ઈન્સ્ટાગ્રામ સ્ટોરી પર પોતાની ઈજાની તસવીર શેર કરી છે, જેમાં તેની જમણી આંખ સૂજી ગઈ છે અને કાળી પડી ગઈ છે, તેના ગાલ પર ઘા છે, તેના હોઠ પર સ્ક્રેચ છે અને લોહી વહેતું અટકાવવા માટે તેના નાક પર પટ્ટી બાંધેલી છે. સ્ટોક્સે પોતે સોશિયલ મીડિયા દ્વારા પોતાની એક તસવીર શેર કરીને તેના ચાહકોને આ અંગે જાણકારી આપી હતી.
સ્ટોક્સના ચહેરા પર ક્રિકેટ બોલ વાગવાથી તે ખરાબ રીતે ઘાયલ છે. સ્ટોક્સે મજાકમાં તસવીરની સાથે કેપ્શનમાં લખ્યું કે, તમારે ક્રિકેટ બોલની હાલત જોવી જોઈએ.
મીડિયા રિપોર્ટ્સ અનુસાર, આ દુર્ઘટના ડરહામમાં ઇન્ડોર ફેસિલિટીમાં પ્રેક્ટિસ દરમિયાન થઈ હતી. સ્ટોક્સે બોલ જોયો ન હતો અને અચાનક બોલ તેના ચહેરાની જમણી બાજુએ વાગી ગયો. ઈંગ્લેન્ડ ક્રિકેટ ટીમ માટે આ ચિંતાનો વિષય છે, કારણ કે સ્ટોક્સ પહેલાથી જ ગ્રોઈન ઈન્જરીથી પીડિત હતો અને એશિઝ સિરીઝ બાદ તે રિકવરી મોડમાં હતો. ગયા મહિને બેન સ્ટોક્સના નેતૃત્વમાં ઈંગ્લેન્ડને એશિઝ શ્રેણીમાં ઓસ્ટ્રેલિયાના હાથે 4-1થી કારમી હારનો સામનો કરવો પડ્યો હતો.
બેન સ્ટોક્સ ઈંગ્લેન્ડના વ્હાઈટ બોલ સેટઅપમાંથી બહાર છે અને આગામી T20 વર્લ્ડ કપમાં નહીં રમે. તેની મેદાનમાં વાપસી જૂનમાં ન્યૂઝીલેન્ડ સામેની લોર્ડ્સ ટેસ્ટમાં થવાની આશા છે.
