T20 વર્લ્ડ કપના ચોથા દિવસે કુલ ત્રણ મેચ રમાઈ હતી. નેધરલેન્ડે નામિબિયાને હરાવીને ટુર્નામેન્ટમાં પોતાની પ્રથમ જીત નોંધાવી હતી. આ સાથે જ ન્યૂઝીલેન્ડ અને પાકિસ્તાને પોતપોતાની મેચો જીતીને ટૂર્નામેન્ટમાં પોતાની સ્થિતિ મજબૂત કરી લીધી છે. T-20 વર્લ્ડ કપની 11મી મેચમાં ન્યુઝીલેન્ડે 28 બોલ બાકી રહેતા સંયુક્ત આરબ અમીરાતને 10 વિકેટથી હરાવ્યું. જ્યારે પાકિસ્તાને ગત વર્લ્ડ કપમાં મળેલી હારનો બદલો લઈ અમેરિકાને 32 રને હરાવ્યું હતું.
નેધરલેન્ડે નામિબિયાને હરાવ્યું
T20 વર્લ્ડ કપના ગ્રુપ A મેચમાં નેધરલેન્ડે નામીબિયાને સાત વિકેટે હરાવ્યું હતું. ટોસ જીતીને નામિબિયાને બેટિંગ માટે મોકલનાર નેધરલેન્ડની ટીમે તેના બોલરોના શિસ્તબદ્ધ પ્રદર્શનને કારણે તેને આઠ વિકેટે 156 રન સુધી મર્યાદિત કરી દીધી હતી. ડી લીડે ત્રણ ઓવરમાં 20 રન આપીને બે વિકેટ અને લોગાન વેન બીકે ત્રણ ઓવરમાં 13 રન આપીને બે વિકેટ લીધી હતી. જવાબમાં ડી લીડેની 48 બોલમાં 72 રનની અણનમ ઈનિંગના આધારે નેધરલેન્ડે 18 ઓવરમાં ત્રણ વિકેટે 159 રન બનાવ્યા હતા. ડી લીડે તેની ઇનિંગ્સમાં પાંચ ચોગ્ગા અને ચાર છગ્ગા ફટકાર્યા હતા અને કોલિન એકરમેન (28 બોલમાં 32) સાથે ત્રીજી વિકેટ માટે 70 રનની ભાગીદારી પણ કરી હતી. તેના ઓલરાઉન્ડ પ્રદર્શન માટે તેને પ્લેયર ઓફ ધ મેચ પસંદ કરવામાં આવ્યો હતો. અરુણ જેટલી સ્ટેડિયમમાં ટી20 વર્લ્ડ કપની આ પ્રથમ મેચ હતી પરંતુ અઠવાડિયાના મધ્યમાં શાળાની પરીક્ષાઓ હોવાના કારણે મેદાન ખાલી રહ્યું હતું. ભારતીય ટીમ આ મેદાન પર 12 ફેબ્રુઆરીએ નામીબિયા સામે રમશે.
ન્યુઝીલેન્ડે UAE ને કચડી નાખ્યું
ટિમ સેફર્ટ અને ફિન એલન વચ્ચે પ્રથમ વિકેટ માટે 92 બોલમાં 175 રનની વિક્રમી ભાગીદારીથી ન્યૂઝીલેન્ડે ICC T20 વર્લ્ડ કપ મેચમાં UAEને 28 બોલ બાકી રહેતા 10 વિકેટથી હરાવીને સતત બીજી જીત નોંધાવી હતી. યુએઈને છ વિકેટે 173 રન પર રોક્યા બાદ ન્યૂઝીલેન્ડે માત્ર 15.2 ઓવરમાં કોઈ પણ નુકશાન વિના 175 રન બનાવીને એકતરફી જીત નોંધાવી હતી. ન્યુઝીલેન્ડનો આ સતત બીજો વિજય છે. ટીમે અગાઉ અફઘાનિસ્તાનને હરાવ્યું હતું. ‘પ્લેયર ઓફ ધ મેચ’ સેફર્ટે 42 બોલની અણનમ ઇનિંગમાં 12 ચોગ્ગા અને ત્રણ છગ્ગા ફટકાર્યા હતા. એલને 50 બોલમાં તેની અણનમ ઇનિંગમાં પાંચ સિક્સર અને એટલા ચોગ્ગા ફટકાર્યા હતા. સુકાની મોહમ્મદ વસીમ (અણનમ 66) અને અલીશા શરાફુ (55)ની અડધી સદી અને તેમની વચ્ચે બીજી વિકેટ માટે 107 રનની ભાગીદારીથી સંયુક્ત આરબ અમીરાત (યુએઈ)એ છ વિકેટે 173 રન બનાવ્યા હતા.
પાકિસ્તાને અમેરિકાને હરાવ્યું
સાહિબજાદા ફરહાન (73 રન)ની અડધી સદીની મદદથી પાકિસ્તાને મંગળવારે ICC T20 વર્લ્ડ કપની ગ્રુપ A મેચમાં અમેરિકા સામે 32 રને જીત નોંધાવી હતી. બેટિંગ માટે આમંત્રણ મળ્યા બાદ પાકિસ્તાને નવ વિકેટે 190 રન બનાવ્યા હતા. જવાબમાં અમેરિકાની ટીમ 20 ઓવરમાં આઠ વિકેટે 158 રન જ બનાવી શકી હતી. આ સાથે પાકિસ્તાને છેલ્લા T20 વર્લ્ડ કપમાં અમેરિકા સામે મળેલી હારનો બદલો પણ લઈ લીધો છે, કારણ કે આ હાર સાથે અમેરિકાની સફર લગભગ ખતમ થઈ ગઈ છે.
