અમેરિકા ટૂંક સમયમાં રાષ્ટ્રપતિ ટ્રમ્પના નેતૃત્વમાં ઈરાન પર હુમલો કરી શકે છે. મિડલ ઈસ્ટમાં તેનો સૌથી મોટો સાથી ઈઝરાયેલ આ હુમલામાં અમેરિકાનો સાથ આપવા જઈ રહ્યો છે. Axiosના રિપોર્ટ અનુસાર, આગામી થોડા દિવસોમાં બંને દેશ મળીને તેહરાન પર મોટો હુમલો કરી શકે છે. આ હુમલો અગાઉના હુમલા કરતા વધુ શક્તિશાળી અને ઝડપી હોવાની અપેક્ષા છે.
એક્સિઓસના રિપોર્ટ અનુસાર, અમેરિકા અને ઈઝરાયલે આ ઓપરેશન માટે ઘણા સમય પહેલાથી તૈયારી કરી લીધી છે. જો ઈરાન સાથે વાતચીત તેમની ઈચ્છા મુજબ નહીં થાય તો બંને દેશ આ ઓપરેશનને આગળ ધપાવશે. આ ઓપરેશનની વ્યાપક અસર અગાઉના હુમલા કરતા ઘણી વધારે હશે, જે 12 દિવસ સુધી ચાલ્યો હતો. રિપોર્ટ અનુસાર, ટ્રમ્પ વહીવટીતંત્ર એક હુમલાની તૈયારી કરી રહ્યું છે જે મર્યાદિત નહીં પરંતુ મોટા પાયે સૈન્ય ઓપરેશન જેવું હશે.
હાલમાં અમેરિકા અને ઈરાન વચ્ચે વાતચીત ચાલી રહી છે, પરંતુ બંને દેશો એકબીજાને સતત ધમકીઓ આપી રહ્યા છે. આ કારણે મધ્ય પૂર્વમાં સતત તણાવની સ્થિતિ છે. અહેવાલો અનુસાર, જિનીવામાં ચાલી રહેલી શાંતિ મંત્રણા વચ્ચે અમેરિકાએ આ ક્ષેત્રમાં પોતાના સૈન્ય મથકો પર તૈનાતી વધારી દીધી છે. અહીં મોટી સંખ્યામાં અમેરિકન હથિયારો અને અમેરિકન ફાઈટર એરક્રાફ્ટ તૈનાત કરવામાં આવ્યા છે.
